ទិន្នន័យផ្លូវការបានបង្ហាញកាលពីថ្ងៃអង្គារថា ទីផ្សារការងាររបស់ចក្រភពអង់គ្លេស បានបង្ហាញពីសញ្ញានៃភាពធូរស្រាលបន្ថែមទៀតក្នុងត្រីមាសទី២ ដោយកន្លែងការងារដែលត្រូវការមនុស្ស និងបុគ្គលិកដែលមានឈ្មោះក្នុងបញ្ជីបើកប្រាក់ខែបានធ្លាក់ចុះ។ អត្រាគ្មានការងារធ្វើមានចំនួន ៤,៧ ភាគរយ ជាកម្រិតខ្ពស់បំផុតក្នុងរយៈពេល៤ ឆ្នាំកន្លងមកនេះ ។      

ការិយាល័យស្ថិតិជាតិ (ONS) បានរាយការណ៍ថា ដំណឹងជ្រើសរើសបុគ្គលិកបានធ្លាក់ចុះ ៥,៨ភាគរយនៅក្នុងត្រីមាសខែឧសភា ដល់ខែកក្កដា មកត្រឹម ៧១៨,០០០នាក់ ជាមួយនឹងការធ្លាក់ចុះនៅក្នុងវិស័យឧស្សាហកម្មចំនួន ១៦ ក្នុងចំណោម ១៨ ដែលត្រូវបានត្រួតពិនិត្យ ដោយរួមទាំងវិស័យសិល្បៈ កម្មវិធីកម្សាន្ត និងសកម្មភាពកម្សាន្ត ធ្លាក់ចុះ ១៧,៦ ភាគរយធៀបនឹងត្រីមាសមុន។ 

ចំនួនបុគ្គលិកបើកប្រាក់បៀវត្សរ៍ក្នុងខែមិថុនាបានធ្លាក់ចុះចំនួន១៤៩,០០០នាក់ ឬ ០,៥ ភាគរយធៀបនឹងឆ្នាំមុន និង ២៦,០០០ នាក់ ឬ ០,១ភាគរយ ធៀបនឹងខែមុន។ ការប៉ាន់ប្រមាណដំបូងសម្រាប់ខែកក្កដាបានដាក់តួលេខនេះចំនួន៣០,៣ លាននាក់។     

លោកសាស្ត្រាចារ្យ David Bailey មកពីសាកលវិទ្យាល័យ Birmingham នៅអង់គ្លេស បានកត់សម្គាល់ថា ការដំឡើងពន្ធរបស់សហរដ្ឋអាមេរិកកំពុងបន្ថែមសម្ពាធដល់ការសម្រេចចិត្តរបស់ក្រុមហ៊ុនទាក់ទងនឹងការជ្រើសរើសបុគ្គលិក។ លោកថា ខណៈកិច្ចព្រមព្រៀងពាណិជ្ជកម្មរវាងសហរដ្ឋអាមេរិក និងចក្រភពអង់គ្លេសត្រូវសម្រេចបាន ពន្ធលើទំនិញរថយន្តនៅតែកើនឡើងពី២,៥ ទៅ ១០ ភាគរយ ដែលប៉ះពាល់ដល់ការនាំចេញ និងប្រាក់ចំណេញសម្រាប់ក្រុមហ៊ុនផលិតធំៗដូចជា Jaguar Land Rover ដែលបានប្រកាសកាត់បន្ថយការងារចំនួន ៥០០កន្លែង៕