រដ្ឋមន្ត្រីការបរទេសនៃប្រទេសចំនួន២៤បានចេញសេចក្តីថ្លែងការណ៍រួមមួយ ដោយជំរុញអ៊ីស្រាអែលអនុញ្ញាតឱ្យមានការដឹកជញ្ជូនជំនួយដែលគ្មានការរឹតត្បិតចូលទៅក្នុងតំបន់ហ្កាហ្សា។ សេចក្តីថ្លែងការណ៍ដែលបានចេញផ្សាយកាលពីថ្ងៃអង្គារនិយាយថា ការរងទុក្ខផ្នែកមនុស្សធម៌នៅក្នុងតំបន់ហ្កាហ្សា បានឈានដល់កម្រិតមិននឹកស្មានដល់។

ក្រុមរដ្ឋមន្ត្រី បានអំពាវនាវឱ្យអ៊ីស្រាអែលផ្តល់ការអនុញ្ញាតដឹកជញ្ជូនជំនួយរបស់អង្គការក្រៅរដ្ឋាភិបាលអន្តរជាតិទាំងអស់ និងដើម្បីបើកប្រតិបត្តិការដោយអង្គការមនុស្សធម៌សំខាន់ៗ។ យោធាអ៊ីស្រាអែល បាននិងកំពុងផ្តល់ផ្លូវសុវត្ថិភាព ដើម្បីពង្រីកការដឹកជញ្ជូនជំនួយចាប់តាំងពីចុងខែកក្កដា ប៉ុន្តែការខ្វះស្បៀងធ្ងន់ធ្ងរនៅតែបន្ត។

អាជ្ញាធរសុខាភិបាលក្នុងតំបន់ហ្កាហ្សាបាននិយាយថា មនុស្សចំនួន២២៧នាក់ រួមទាំងកុមារ១០៣នាក់បានស្លាប់ដោយសារកង្វះអាហារូបត្ថម្ភគិតត្រឹមថ្ងៃអង្គារ សប្តាហ៍នេះ។ មន្ត្រីក្នុងតំបន់ និយាយថា មនុស្សជាង១.៨០០នាក់បានស្លាប់ បន្ទាប់ពីពួកគេត្រូវបានបាញ់ដោយទាហានអ៊ីស្រាអែលនៅជិតកន្លែងចែកចាយជំនួយ។

សេចក្តីថ្លែងការណ៍ក៏បាននិយាយផងដែរថា បទឈប់បាញ់ គឺត្រូវការជាចាំបាច់ ដើម្បីអាចផ្តល់ជំនួយចូលទៅកាន់តំបន់ហ្កាហ្សាតាមដីគោកដោយមិនត្រូវបានរារាំង។ ប៉ុន្តែស្ថានភាពមនុស្សធម៌ អាចនឹងកាន់តែយ៉ាប់យ៉ឺនបន្ថែមទៀត ខណៈអ៊ីស្រាអែលមានផែនការពង្រីកប្រតិបត្តិការយោធារបស់ខ្លួននៅក្នុងដែនដីប៉ាឡេស្ទីន។