យោងតាមក្រុមគ្រូពេទ្យបានឱ្យដឹងកាលពីថ្ងៃអង្គារ (១២ សីហា) ថា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនលើសពី ៧០នាក់ នៅទូទាំងតំបន់ហ្កាហ្សាស្រ្ទីប ក្នុងពេល ២៤ម៉ោងកន្លងទៅនោះ បន្ថែមពីលើការស្លាប់របស់មនុស្សមួយចំនួន រួមទាំងកុមារអាយុ ៦ឆ្នាំម្នាក់ ដោយសារតែភាពអត់ឃ្លានដ៏មហន្តរាយ។

អ្នកដែលត្រូវបានសម្លាប់កាលពីថ្ងៃអង្គារ រួមមានអ្នកស្វែងរកជំនួយជិត ២០នាក់ ហើយកើតឡើងខណៈដែលសហភាពអឺរ៉ុប និងប្រទេសចំនួន២៦ រួមទាំងកាណាដា បារាំង និងចក្រភពអង់គ្លេស បានថ្កោលទោសខ្លាំងៗចំពោះ "កម្រិតដែលមិនអាចនឹកស្មានដល់" នៃភាពឈឺចាប់ទុក្ខវេទនាក្នុងហ្កាហ្សា ហើយបានអំពាវនាវឱ្យមានវិធានការបន្ទាន់ដើម្បីបញ្ឈប់ និងបញ្ចៀសទុរ្ភិក្ស ដែលកំពុងកើតឡើងក្នុងទឹកដីប៉ាឡេស្ទីនដ៏តូចចង្អៀត ដែលហែកហួរដោយសង្រ្គាមមួយនេះ។

អ្នកដែលរួចជីវិតពីការវាយប្រហារចុងក្រោយបំផុតលើអ្នកស្វែងរកជំនួយ នៅជិតច្រកឆ្លងកាត់ Zikim នៅភាគខាងជើងហ្កាហ្សានេះ បានពណ៌នាពីទិដ្ឋភាពដ៏រន្ធត់នៃការបង្ហូរឈាមគ្រប់ទីកន្លែង។ ការសម្លាប់នៅច្រក Zikim បានធ្វើឱ្យចំនួនការស្លាប់នៃអ្នកស្វែងរកជំនួយ ឡើងដល់ជិត ១.៨៤០នាក់ ចាប់តាំងពីចុងខែឧសភាមក នៅពេលមូលនិធិហ្កាហ្សា GHF គាំទ្រដោយអាមេរិក ចាប់ផ្តើមប្រតិបត្តិការនៅហ្កាហ្សា។

ក្រសួងសុខាភិបាលរបស់ហ្កាហ្សា បាននិយាយនៅថ្ងៃអង្គារថា មនុស្សមួយចំនួនទៀតបានស្លាប់ដោយសារទុរ្ភិក្សក្នុងពេល ២៤ម៉ោងកន្លងទៅនោះ ដែលនាំឱ្យចំនួនសរុបនៃការស្លាប់ដែលទាក់ទងនឹងភាពអត់ឃ្លាន ចាប់តាំងពីការចាប់ផ្តើមនៃសង្គ្រាមអ៊ីស្រាអែលមក បានកើនឡើងដល់ជិត ២៣០នាក់ ហើយជនរងគ្រោះរួមមានកុមារជាង ១០០នាក់៕