អនុរដ្ឋមន្ត្រីក្រសួងហិរញ្ញវត្ថុ លោក Liao Min បាននិយាយនៅថ្ងៃពុធ (១៣ សីហា) នេះថា ប្រទេសចិន គ្រោងនឹងជំរុញសកម្មភាពប្រើប្រាស់ក្នុងស្រុក ដោយផ្តល់ការឧបត្ថម្ភធនផ្នែកការប្រាក់លើឥណទានសម្រាប់ក្រុមគ្រួសារ និងអាជីវកម្ម ក្នុងគោលបំណងកាត់បន្ថយការចំណាយទៅលើការខ្ចីប្រាក់ និងជំរុញការចំណាយទូទៅរបស់ប្រជាជន។

សម្ពាធពីពន្ធគយរបស់សហរដ្ឋអាមេរិក បានបង្កើនការអំពាវនាវឱ្យមានការផ្លាស់ប្តូរយុទ្ធសាស្រ្តរយៈពេលវែង។ ថ្លែងក្នុងសន្និសីទសារព័ត៌មានមួយ លោក Liao លើកឡើងថា គោលនយោបាយនេះ "នឹងគាំទ្រការប្រើប្រាស់ក្នុងស្រុកឱ្យក្លាយជាកម្លាំងជំរុញដ៏សំខាន់នៃសេដ្ឋកិច្ចជាតិ"។

កាលពីថ្ងៃអង្គារ ចិនបានប្រកាសរួចហើយថា ខ្លួននឹងផ្តល់ប្រាក់ឧបត្ថម្ភធនលើការប្រាក់សម្រាប់អាជីវកម្ម ក្នុងវិស័យសេវាកម្មអតិថិជនចំនួន ៨វិស័យ ក៏ដូចជាសម្រាប់អ្នកប្រើប្រាស់ម្នាក់ៗផងដែរ។ អាជីវកម្ម និងអ្នកប្រើប្រាស់ដែលមានសិទ្ធិទទួលបានការគាំទ្របែបនេះ អាចទទួលបានប្រាក់ឧបត្ថម្ភធនលើការប្រាក់ប្រចាំឆ្នាំ ១% លើប្រាក់កម្ចី។

លោក Wang Bo មន្ត្រីនៅក្រសួងពាណិជ្ជកម្មចិន បាននិយាយក្នុងសន្និសីទសារព័ត៌មាននោះថា ការប្រើប្រាស់លើសេវាកម្មនៅប្រទេសចិន មានសក្ដានុពលកំណើនគួរឱ្យកត់សម្គាល់ ហើយគោលនយោបាយនេះ នឹងជួយពង្រីកតម្រូវការក្នុងស្រុក និងស្ថិរភាពការងារឱ្យកាន់តែប្រសើរ៕