នាយករដ្ឋមន្ត្រីនូវ៉ែលហ្សេឡង់ លោក Christopher Luxon នៅថ្ងៃពុធ (ទី១៣ ខែសីហា) នេះ បាននិយាយថា មេដឹកនាំអ៊ីស្រាអែល លោក Benjamin Netanyahu បាន «ខូចផែនការ» របស់លោក ខណៈដែលប្រទេសនេះថ្លឹងថ្លែងថា តើត្រូវទទួលស្គាល់រដ្ឋប៉ាឡេស្ទីនដែរ ឬយ៉ាងណា។

លោក Luxon បានប្រាប់អ្នកសារព័ត៌មានថា កង្វះនៃលំហូរជំនួយមនុស្សធម៌ ការផ្លាស់ទីលំនៅមនុស្សដោយបង្ខំ និងការបញ្ចូលតំបន់ហ្កាហ្សាជាដែនដីឧបសម្ព័ន្ធ គឺជារឿងដ៏គួរឲ្យរន្ធត់ និងមិនអាចទទួលយកបានទាំងស្រុង ដោយបញ្ជាក់ថា លោក Netanyahu បានទៅកាន់តែឆ្ងាយពីគោលបំណងដើមហើយ។ លោក Luxon ដែលជាអ្នកដឹកនាំរដ្ឋាភិបាលចម្រុះកណ្តាល-ស្តាំនិយម បានបន្ថែមថា៖ «ខ្ញុំគិតថា គាត់ (លោក Netanyahu) បានខូចខាតផែនការដើម។ អ្វីដែលយើងកំពុងមើលឃើញពេញមួយយប់ ពោលគឺការវាយប្រហារលើទីក្រុងហ្កាហ្សា គឺជាការមិនអាចទទួលយកបានទាំងស្រុង»។

នៅដើមសប្តាហ៍នេះ លោក Luxon បានប្រាប់ថា នូវ៉ែលហ្សេឡង់កំពុងពិចារណាថា តើត្រូវទទួលស្គាល់រដ្ឋប៉ាឡេស្ទីនដែរ ឬយ៉ាងណា។ កាលពីថ្ងៃចន្ទ សម្ព័ន្ធមិត្តជិតស្និទ្ធរបស់ប្រទេសនេះ គឺអូស្ត្រាលី បានចូលរួមជាមួយកាណាដា ចក្រភពអង់គ្លេស និងបារាំង ក្នុងការប្រកាសថា ខ្លួននឹងធ្វើការទទួលស្គាល់ នៅក្នុងសន្និសីទអង្គការសហប្រជាជាតិ នាខែកញ្ញា។

អង់គ្លេស កាណាដា អូស្ត្រាលី និងសម្ព័ន្ធមិត្តអឺរ៉ុបមួយចំនួនរបស់ប្រទេសទាំងនេះ បានលើកឡើងកាលពីថ្ងៃអង្គារថា វិបត្តិមនុស្សធម៌ នៅតំបន់ហ្កាហ្សា បានឈានដល់ «កម្រិតមិនអាចនឹកស្មានដល់» ដោយបានអំពាវនាវឲ្យអ៊ីស្រាអែលអនុញ្ញាតឲ្យមានការផ្តល់ជំនួយ ដោយមិនមានការរឹតបន្តឹងចូលទៅក្នុងដែនដីប៉ាឡេស្ទីនដែលហែកហួរដោយសង្រ្គាមមួយនេះ៕