ដោយដកស្រង់ប្រភពនានា សារព័ត៌មាន Indian Express បានរាយការណ៍នៅថ្ងៃពុធ (ទី១៣ ខែសីហា) នេះថា នាយករដ្ឋមន្ត្រីឥណ្ឌា លោក Narendra Modi ទំនងជានឹងជួបជាមួយប្រធានាធិបតីអាមេរិក Donald Trump ក្នុងអំឡុងពេលទស្សនកិច្ច នៅសហរដ្ឋអាមេរិក ក្នុងខែកញ្ញា ដើម្បីចូលរួមមហាសន្និបាតអង្គការសហប្រជាជាតិ (UN)។

មហាសន្និបាតរបស់ UN នឹងចាប់ផ្តើមនៅថ្ងៃទី៩ ខែកញ្ញា ប៉ុន្តែកិច្ចប្រជុំប្រចាំឆ្នាំរបស់បណ្ដាប្រមុខរដ្ឋ និងរដ្ឋាភិបាល នឹងធ្វើឡើងចាប់ពីថ្ងៃទី២៣ ដល់ថ្ងៃទី២៩ ខែកញ្ញា។

សារព័ត៌មាននេះបានឲ្យដឹងទៀតថា ទោះបីជាហេតុផល សម្រាប់ដំណើរទស្សនកិច្ចនាពេលខាងមុខនេះ គឺដើម្បីទៅចូលរួមអង្គប្រជុំរបស់ UN នៅទីក្រុងញូវយ៉កក៏ដោយ ក៏គោលបំណងសំខាន់ គឺដើម្បីជួបពិភាក្សាជាមួយលោក Trump និងដើម្បីដោះស្រាយបញ្ចប់បញ្ហាពាណិជ្ជកម្ម និងពន្ធគយ ពោលគឺជាបញ្ហាដែលនាំឲ្យមានការរង្គោះរង្គើដល់ទំនាក់ទំនងរវាងប្រទេសទាំង២។

ព័ត៌មានអំពីលទ្ធភាពនៃការធ្វើដំណើររបស់លោក Modi ទៅកាន់សហរដ្ឋអាមេរិក បានកើតឡើងប៉ុន្មានថ្ងៃបន្ទាប់ពីលោក Trump បានប្រកាសពន្ធបន្ថែម ២៥ភាគរយលើទំនិញឥណ្ឌា ដើម្បីដាក់ទណ្ឌកម្មទីក្រុងញូវដេលី ដែលបន្តទិញប្រេងពីរុស្ស៊ី។ ការពិន័យនេះបានធ្វើឲ្យពន្ធសរុបលើទំនិញឥណ្ឌា ដែលនាំចេញទៅសហរដ្ឋអាមេរិកឡើងដល់ ៥០ភាគរយ ជាកម្រិតក្នុងចំណោមការយកអត្រាខ្ពស់បំផុតលើដៃគូពាណិជ្ជកម្មរបស់សហរដ្ឋអាមេរិក។

កិច្ចចរចាពាណិជ្ជកម្ម រវាងទីក្រុងញូវដេលី និងវ៉ាស៊ីនតោន បានដួលរលំបន្ទាប់ពីការជួបគ្នាចំនួន ៥ជុំ ដោយសារការមិនចុះសម្រុង លើការបើកចំហកសិដ្ឋាន និងវិស័យទឹកដោះគោដ៏ធំរបស់ប្រទេសឥណ្ឌា និងការបញ្ឈប់ការទិញប្រេងពីរុស្ស៊ី៕