គម្រោងដ៏ល្បីល្បាញនៃប្រព័ន្ធការពារមីស៊ីល Golden Dome របស់រដ្ឋបាលលោក Donald Trump នឹងមាន ៤ស្រទាប់ ពោលគឺមួយនៅលើផ្កាយរណប និង ៣នៅលើដី ដោយប្រព័ន្ធរយៈចម្ងាយខ្លីចំនួន ១១ មានទីតាំងនៅទូទាំងទ្វីបអាមេរិក រដ្ឋ Alaska និង Hawaii។ នេះបើយោងតាមការបង្ហាញស្លាយរបស់រដ្ឋាភិបាលសហរដ្ឋអាមេរិកលើគម្រោងដែលត្រូវបានរាយការណ៍ដំបូងគេដោយសារព័ត៌មាន Reuters។

ស្លាយដែលដាក់ចំណងជើងថា «ដើរឲ្យលឿន គិតឲ្យធំ!» ត្រូវបានបង្ហាញដល់អ្នកម៉ៅការផ្នែកការពារចំនួន ៣.០០០នាក់ នៅទីក្រុង Huntsville រដ្ឋ Alabama កាលពីសប្តាហ៍មុន និងបង្ហាញពីភាពស្មុគស្មាញដែលមិនធ្លាប់មានពីមុនមកនៃប្រព័ន្ធនេះ ខណៈដែលប្រឈមនឹងកាលកំណត់ឆ្នាំ២០២៨ ដែលដាក់ដោយប្រធានាធិបតីអាមេរិក លោក Trump។

ប្រព័ន្ធនេះត្រូវបានគេប៉ាន់ប្រមាណថា មានតម្លៃ ១៧៥ពាន់លានដុល្លារអាមេរិក ប៉ុន្តែស្លាយបង្ហាញពីភាពមិនប្រាកដប្រជា ដែលនៅតែមានលើស្ថាបត្យកម្មមូលដ្ឋាននៃគម្រោងនេះ ពីព្រោះចំនួនជើងទម្រ ប្រព័ន្ធស្ទាក់ចាប់ ស្ថានីយ៍លើដី និងទីតាំងមីស៊ីលដែលត្រូវការចាំបាច់ សម្រាប់ប្រព័ន្ធនេះ មិនទាន់ត្រូវបានកំណត់នៅឡើយទេ។

រហូតមកដល់ពេលនេះ សភាបានយល់ព្រមលើទឹកប្រាក់ ២៥ពាន់លានដុល្លារ សម្រាប់គម្រោង Golden Dome នៅក្នុងសេចក្ដីស្នើច្បាប់ពន្ធ និងចំណាយរបស់លោក Trump ដែលបានទទួលបានការអនុម័ត កាលពីខែកក្កដា។ ហើយទឹកប្រាក់ ៤៥,៣ពាន់លានដុល្លារអាមេរិកផ្សេងទៀត ត្រូវបានផ្តល់ជូនសម្រាប់គម្រោង Golden Dome នៅក្នុងសំណើថវិកាប្រធានាធិបតីឆ្នាំ២០២៦ របស់លោក។

គួរបញ្ជាក់ថា ដោយមានបំណងបង្កើតខែលការពារមីស៊ីលច្រើនស្រទាប់ សម្រាប់សហរដ្ឋអាមេរិក ប្រព័ន្ធ Golden Dome ត្រូវបានជំរុញដោយគំរូ Iron Dome របស់អ៊ីស្រាអែល ប៉ុន្តែមានទំហំធំជាង ដោយសារភូមិសាស្ត្រដែលប្រទេសនេះនឹងត្រូវការពារ និងភាពស្មុគស្មាញ ដោយសារការគំរាមកំហែងផ្សេងៗគ្នា ដែលប្រទេសនេះនឹងប្រឈមជាមួយ៕