ភ្លើងឆេះព្រៃនៅជិតទីក្រុង Patras ស្ថិតនៅភាគខាងលិចប្រទេសក្រិក បានបង្ខំឲ្យមានការជម្លៀសមនុស្សចេញពីតំបន់លំនៅដ្ឋាន ២៥កន្លែង ស្របពេលភ្លើងឆេះព្រៃនៅតែបន្តឆាបឆេះ ។

អណ្តាតភ្លើងក្រហមឆ្អាល និងផ្សែងខ្មៅងងឹត បានគ្របដណ្តប់ពីលើរោងចក្រផលិតស៊ីម៉ង់ត៍ដែលបានកើតមានអគ្គិភ័យបង្កឡើងដោយសារភ្លើងឆេះព្រៃ ក្រោយឆាប់ឆេះឆ្លងកាត់ចម្ការអូលីវ និងព្រៃឈើ ហើយនិងបង្អាក់ដល់ការធ្វើចរាចរណ៍តាមដងផ្លូវ និងសេវាកម្មរថភ្លើង ។

បើទោះបីជាមានការព្រមានឲ្យជម្លៀសខ្លួនយ៉ាងណាក្តី អ្នកស្រុកជាច្រើនបន្តស្នាក់នៅក្នុងផ្ទះ ដើម្បីនៅការពារទ្រព្យសម្បត្តិរបស់ពួកគេ ខណៈអ្នកស្រុកខ្លះទៀត ឈរមើលដោយក្តីអស់សង្ឃឹម និងខឹងសម្បារពេលដែលជីវភាពរបស់ពួកគេ ត្រូវបានអណ្តាតភ្លើងលេបត្របាក់ បំផ្លាញយកទៅអស់ ។

ភ្លើងឆេះព្រៃ បានកើតមានកាលពីថ្ងៃអង្គារ និងបានរីករាលដាលយ៉ាងឆាប់រហ័សនៅទូទាំងតំបន់ឧស្សាហកម្ម Patras ដោយបានបំផ្លិចបំផ្លាញផ្ទះសម្បែងប្រជាពលរដ្ឋ រថយន្ត និងរោងចក្រ ហើយនៅតែមិនអាចគ្រប់គ្រងបានដដែល នាថ្ងៃពុធនេះ ។

នៅថ្ងៃពុធនេះដែរ ភ្លើងឆេះព្រៃ បានវាយប្រហារកោះទេសចរណ៍ Chios និងកោះ Zakynthos ។ ក្រុមភ្នាក់ងារពន្លត់អគ្គិភ័យ ៤.៨៥០នាក់ យន្តហោះ ៣៣គ្រឿង ត្រូវបានដាក់ពង្រាយ ដើម្បីទប់ស្កាត់អណ្តាតភ្លើងដែលឆាបឆេះកាន់តែលឿន ដោយសារខ្យល់បក់ខ្លាំង និងគ្រោះរាំងស្ងួត ក្រោយពុំមានភ្លៀងធ្លាក់អស់រយៈពេលជាច្រើនខែមកហើយ នៅទូទាំងប្រទេសក្រិក ៕