បណ្ដាមេដឹកនាំអឺរ៉ុប នឹងបើកកិច្ចពិភាក្សាតាមប្រព័ន្ធអ៊ីនធឺណិតជាមួយប្រធានាធិបតីអាមេរិក លោក Donald Trump នៅថ្ងៃពុធ (ទី១៣ ខែសីហា) នេះ ដោយសង្ឃឹមថា នឹងអាចបញ្ចុះបញ្ចូលមេដឹកនាំអាមេរិក ពាក់ព័ន្ធនឹងផលប្រយោជន៍របស់អ៊ុយក្រែន នៅពេលដែលលោកពិភាក្សាអំពីសង្គ្រាម ជាមួយប្រធានាធិបតីរុស្ស៊ី លោក Vladimir Putin នៅរដ្ឋ Alaska នាថ្ងៃសុក្រចុងសប្ដាហ៍នេះ។

អធិការបតីអាល្លឺម៉ង់ លោក Friedrich Merz បានអញ្ជើញប្រធានាធិបតីអ៊ុយក្រែន លោក Volodymyr Zelenskyy ក៏ដូចជាមេដឹកនាំបារាំង អង់គ្លេស និងអឺរ៉ុបផ្សេងទៀត ព្រមទាំងប្រមុខសហភាពអឺរ៉ុប (EU) និងអង្គការណាតូឲ្យចូលរួមសន្និសីទតាមវីដេអូ នារសៀលថ្ងៃពុធនេះ។ បន្ទាប់មក មេដឹកនាំទាំងនោះ រំពឹងថា នឹងជួបជាមួយលោក Trump និងអនុប្រធានាធិបតីអាមេរិក លោក JD Vance អំឡុងជុំទី ២ នៃសន្និសីទតាមអនឡាញនេះ។

មកទល់ពេលនេះ កិច្ចប្រជុំ Trump-Putin នាថ្ងៃសុក្រនេះ ដែលជាលើកដំបូងរបស់មេដឹកនាំទាំង២ ចាប់តាំងពីរុស្ស៊ីបានចាប់ផ្តើមការលុកលុយទ្រង់ទ្រាយធំរបស់ខ្លួន លើអ៊ុយក្រែន កាលពី ៣ឆ្នាំមុន គ្រោងនឹងបន្តដោយគ្មានវត្តមានរបស់លោក Zelenskyy។ ការធ្វើបែបនេះបានជំរុញឲ្យទីក្រុងគីវ បារម្ភថា អាចត្រូវបានបង្ខំឲ្យព្រមធ្វើសម្បទានដែលមិនអាចទទួលយកបាន ក្នុងនោះរួមទាំងការដែនដីផងដែរ៕