ក្រុមហ៊ួទីនៅប្រទេសយេម៉ែន បាននិយាយកាលពីយប់ថ្ងៃអង្គារថា ខ្លួនបានបើកការវាយប្រហារដោយ យានដ្រូនចំនួន ៤លើក ដោយកំណត់គោលដៅទៅលើទីក្រុងរបស់អ៊ីស្រាអែលដូចជា Haifa, Negev, Eilat និង Be'er Sheva នៅព្រឹកថ្ងៃដដែល។

អ្នកនាំពាក្យយោធារបស់ក្រុមនេះ លោក Yahya Sarea បាននិយាយនៅក្នុងសេចក្តីថ្លែងការណ៍មួយ ដែលចាក់ផ្សាយដោយទូរទស្សន៍ al-Masirah TV ថា ការវាយប្រហារដោយយានដ្រូនចំនួន ៦គ្រឿង«បានត្រូវចំគោលដៅរបស់ពួកវា ដោយជោគជ័យ»។

លោក Sarea បាននិយាយថា ការវាយប្រហារទាំងនេះ ត្រូវបានធ្វើឡើង ជាការឆ្លើយតបទៅនឹង «ការអនុវត្តផែនការរបស់អ៊ីស្រាអែល ក្នុងការបំផ្លាញបុព្វហេតុប៉ាឡេស្ទីន តាមរយៈអំពើប្រល័យពូជសាសន៍ ការបង្អត់អាហារ និងការផ្លាស់ទីលំនៅ»។

លោកក៏បានប្តេជ្ញាបន្តការវាយប្រហារប្រឆាំងនឹងអ៊ីស្រាអែល រហូតដល់ «ការឈ្លានពានលើតំបន់ហ្កាហ្សាស្ទ្រីប ត្រូវបានបញ្ឈប់ ហើយការបិទផ្លូវ ត្រូវបានដកចេញទាំងស្រុង។

ពុំមានការអត្ថាធិប្បាយភ្លាមៗពីអ៊ីស្រាអែលទាក់ទងនឹងការវាយប្រហាររបស់ក្រុមនេះទេ។

កងកម្លាំងរបស់ក្រុមហ៊ួទី បានបាញ់មីស៊ីល និងយានដ្រូនរាប់សិបគ្រឿង ឆ្ពោះទៅកាន់ប្រទេសអ៊ីស្រាអែល ចាប់តាំងពីការចាប់ផ្តើមនៃសង្គ្រាមនៅតំបន់ហ្កាហ្សា ក្នុងខែតុលា ឆ្នាំ ២០២៣ ដោយលើកឡើងពីសាមគ្គីភាពជាមួយប្រជាជនប៉ាឡេស្ទីន។ មីស៊ីលភាគច្រើន ត្រូវបានស្ទាក់ចាប់ ឬខកខានមិនបានត្រូវចំគោលដៅរបស់ពួកវាទេ។ ជាការឆ្លើយតប អ៊ីស្រាអែលបានធ្វើការវាយប្រហារជាបន្តបន្ទាប់ទៅលើកំពង់ផែ និងហេដ្ឋារចនាសម្ព័ន្ធផ្សេងទៀត នៅក្នុងប្រទេសយេម៉ែន។