អង្គការអឌ្ឍចន្ទក្រហមអេហ្ស៊ីប បានបញ្ជូនក្បួនរថយន្តដឹកជំនួយ ទៅកាន់តំបន់ហ្កាហ្សា ដើម្បីជួយដល់ប្រជាជនប៉ាឡេស្ទីន ២លាននាក់ នៅក្នុងតំបន់នោះ។

រថយន្តជំនួយជាច្រើនគ្រឿង បានដឹកជំនួយមនុស្សធម៌ចំនួន ២.៣០០តោន ទៅកាន់តំបន់ហ្កាហ្សា ក្នុងនោះមានអាហារ ម្សៅ និងថ្នាំចំនួន ២.២០០កេស។ កិច្ចខិតខំប្រឹងប្រែងនេះ គឺជាផ្នែកមួយនៃគំនិតផ្តួច   ផ្តើមផ្តល់ជំនួយ Zad Al-Izza ពីប្រទេសអេហ្ស៊ីប ទៅតំបន់ហ្កាហ្សា ជាគំនិតផ្តួចផ្តើមមួយត្រូវបានចាប់   ផ្តើម នៅថ្ងៃទី ២៧ ខែកក្កដា ដែលក៏បានចែកចាយម្សៅ ទឹកដោះគោទារក ថ្នាំពេទ្យ និងការព្យាបាល ការផ្គត់ផ្គង់ការថែទាំរាងកាយ និងប្រេងឥន្ធនៈ ក្នុងបរិមាណដ៏ច្រើន។

រថយន្តដឹកជំនួយទាំងនេះ បានចូលក្នុងតំបន់ហ្កាហ្សាស្ទ្រីប តាមច្រក Kerem Abu Salem ដែលស្ថិតនៅចំណុចភាគខាងត្បូងនៃទឹកដីនេះ។ ច្រកឆ្លងកាត់នេះ ត្រូវបានគ្រប់គ្រងដោយអ៊ីស្រាអែល។

អង្គការអឌ្ឍចន្ទក្រហមអេហ្ស៊ីប បាននិយាយថា ច្រកឆ្លងកាត់ Rafah ដែលគ្រប់គ្រងដោយប្រទេសអេហ្ស៊ីបនៅម្ខាងនៃព្រំដែន នៅតែដំណើរការ ដោយមានរថយន្តជាង ៣៦.000 គ្រឿង កំពុងផ្តល់ជំនួយមនុស្សធម៌ប្រហែលកន្លះលានតោន ដែលគាំទ្រដោយអ្នកស្ម័គ្រចិត្ត ៣៥.000 នាក់ ចាប់តាំងពីជម្លោះ បានចាប់ផ្តើម។

 នៅខែឧសភា ឆ្នាំ ២០២៤ កងកម្លាំងអ៊ីស្រាអែល បានបើកការវាយប្រហារយោធាលើទីក្រុង Rafah ដោយធ្វើឲ្យសង្កាត់ទាំងអស់ខូចខាតទាំងស្រុង និងបានបំផ្លាញចំណតនៅឆ្លងកាត់ Rafah ។

កងកម្លាំងអ៊ីស្រាអែល បានអនុញ្ញាតឲ្យមានជំនួយតិចតួចប៉ុណ្ណោះ ចូលក្នុងតំបន់ហ្កាហ្សាតាមច្រក Rafah ចាប់តាំងពីសង្រ្គាម បានចាប់ផ្តើម នៅឆ្នាំ ២០២៣។