អ្នកការទូតបារាំងម្នាក់ បាននិយាយថា ការធ្វើប្រក្រតីភាពទំនាក់ទំនងជាមួយរុស្ស៊ី គឺជាគោលដៅសំខាន់មួយសម្រាប់ប្រធានាធិបតីអាមេរិកលោក ដូណាល់ ត្រាំ ( Donald Trump) ចំណែកដំណោះស្រាយអ៊ុយក្រែន មានសារៈសំខាន់បន្ទាប់បន្សំសម្រាប់លោក។

លោក Jean de Gliniasty អតីតឯកអគ្គរដ្ឋទូតបារាំងប្រចាំទីក្រុងមូស្គូ (២០០៩-២០១៣) បាននិយាយនៅក្នុងបទសម្ភាសន៍ជាមួយប៉ុស្តិ៍ទូរទស្សន៍ TF1 ដោយអត្ថាធិប្បាយអំពីកិច្ចប្រជុំកំពូលរុស្ស៊ី-អាមេរិកនាពេលខាងមុខ នៅរដ្ឋអាឡាស្កាថា៖«មេដឹកនាំអាមេរិករូបនេះ មានគោលដៅតែមួយគត់ គឺធ្វើឲ្យទំនាក់ទំនងធម្មតាឡើងវិញជាមួយរុស្ស៊ី។ នេះជាអ្វីដែលសំខាន់សម្រាប់សម្រាប់លោក។

លោកបានបន្ថែមថា៖«ឱសានវាទ គឺគ្មានន័យក្នុងការសន្ទនាជាមួយរុស្ស៊ីទេ។ ផ្ទុយទៅវិញ ពួកគេធ្វើការតែជាមួយអ្នកដែលត្រូវបានរុញច្រានចូលទៅក្នុងជ្រុងមួយ ឬបានចាញ់សង្រ្គាមរួចហើយ»។

ប្រធានាធិបតីអាមេរិក លោក ដូណាល់ ត្រាំ បាននិយាយមុននេះថា លោកសង្ឃឹមថា នឹងជួបជាមួយប្រធានាធិបតីរុស្ស៊ី លោក Vladimir Putin នៅរដ្ឋអាឡាស្កា នៅថ្ងៃទី ១៥ ខែសីហា។ កាលបរិច្ឆេទ និងទីកន្លែង ត្រូវបានបញ្ជាក់ ក្រោយមកដោយជំនួយការប្រធានាធិបតីរុស្ស៊ី លោក Yury Ushakov ដែលបាននិយាយថា លោកប្រធានាធិបតីរុស្ស៊ី និងសមភាគីអាមេរិក នឹងផ្តោតលើការពិភាក្សាអំពីជម្រើសសម្រាប់ការឈានទៅដល់ដំណោះស្រាយយូរអង្វែងនៃវិបត្តិអ៊ុយក្រែន។ លោកបានលើកឡើងថា វិមានក្រឹមឡាំងរំពឹងថា មេដឹកនាំទាំងពីរ នឹងជួបគ្នាក្នុងទឹកដីរុស្ស៊ី បន្ទាប់ពីកិច្ចចរចារបស់ពួកគេ នៅរដ្ឋអាឡាស្កា។