ការប៉ះទង្គិចគ្នា បានផ្ទុះឡើងនៅកន្លែងតវ៉ានៅក្នុងប្រទេសស៊ែរប៊ី រវាងក្រុមប្រឆាំង និងអ្នកគាំទ្ររដ្ឋាភិបាល ក្នុងការកើនឡើងភាពតានតឹង បន្ទាប់ពីមានបាតុកម្មជាបន្តបន្ទាប់អស់រយៈពេលជាង ៩ខែ ប្រឆាំងនឹងប្រធានាធិបតីប្រជាជននិយម Aleksandar Vucic ។

ឧប្បត្តិហេតុ បានចាប់ផ្តើមដំបូង កាលពីល្ងាចថ្ងៃអង្គារ នៅទីក្រុង Vrbas ភាគពាយព្យនៃរដ្ឋធានី បែលក្រាដ (Belgrade) ជាកន្លែងដែលនគរបាលប្រឆាំងកុបកម្ម បានបំបែកក្រុមបាតុករ ចេញពីជំរំតវ៉ា នៅខាងក្រៅការិយាល័យគណបក្សវឌ្ឍភាពស៊ែរប៊ីដែលកំពុងកាន់អំណាច នៅក្នុងទីក្រុងនេះ។

រូបភាពវីដេអូពីកន្លែងកើតហេតុ បានបង្ហាញអ្នកគាំទ្ររដ្ឋាភិបាលបានគប់ដុំថ្ម និងដបទៅលើបាតុករដែលបានគប់វត្ថុផ្សេងៗតបតវិញ។ នគរបាល បាននិយាយថា មនុស្សរាប់សិបនាក់ បានរងរបួស ក្នុងនោះមាននគរបាល ១៦នាក់ផងដែរ។ ឧប្បត្តិហេតុស្រដៀងគ្នានេះ ត្រូវបានរាយការណ៍នៅកន្លែងតវ៉ា នៅក្នុងផ្នែកផ្សេងទៀតនៃប្រទេសនេះ។

ការតវ៉ាដែលដឹកនាំដោយនិស្សិតនៅក្នុងប្រទេសស៊ែរប៊ី បានចាប់ផ្តើមដំបូង នៅក្នុងខែវិច្ឆិកា បន្ទាប់ពីស្ថានីយរថភ្លើង បានដួលរលំ នៅភាគខាងជើងនៃទីក្រុង Novi Sad បានបណ្តាលឲ្យមនុស្ស ១៦នាក់ស្លាប់ ដោយបង្កឲ្យមានការចោទប្រកាន់ពីអំពើពុករលួយ នៅក្នុងគម្រោងហេដ្ឋារចនាសម្ព័ន្ធរបស់រដ្ឋ។