ប្រទេសអេស្ប៉ាញនៅថ្ងៃពុធនេះ បានបង្ហាញពីការគាំទ្រចំពោះសំណើរបស់ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron)សុំឲ្យមានក្រុមចម្រុះអន្តរជាតិ ក្រោមអាណត្តិរបស់អង្គការសហប្រជាជាតិ ដើម្បីធ្វើឲ្យមានស្ថិរភាពនៅតំបន់ហ្កាហ្សា ដោយហៅវាថា ជា «ឧបករណ៍មួយ» ដែលអាចនាំមកនូវសន្តិភាព ដល់តំបន់នេះ។

លោក ម៉ាក្រុង បាននិយាយកាលពីថ្ងៃចន្ទថា បេសកកម្មរបស់អង្គការសហប្រជាជាតិបែបនេះ នឹងត្រូវផ្តល់ភារកិច្ច ក្នុងការធានាដល់តំបន់ហ្កាហ្សាស្ទ្រីប ការពារជនស៊ីវិល និងធ្វើការ ក្នុងការគាំទ្រដល់អភិបាលកិច្ចប៉ាឡេស្ទីន ដែលមិនបានបញ្ជាក់ច្បាស់លាស់។ លោកបានបញ្ជាក់ថា ក្រុមប្រឹក្សាសន្តិសុខអង្គការសហប្រជាជាតិ គួរតែធ្វើការលើការបង្កើតបេសកកម្មនេះ ខណៈដែលប្រទេសបារាំង ក៏នឹងធ្វើការជាមួយដៃគូរបស់ខ្លួន ផងដែរ។

ក្រសួងរបស់អេស្ប៉ាញ បាននិយាយនៅក្នុងការឆ្លើយតបតាមអ៊ីមែល ទៅកាន់សំណួរពីសារព័ត៌មានរ៉យទ័រថា៖«សំណើគឺជាឧបករណ៍មួយ ដែលអាចជួយសម្រេចបានសន្តិភាព និងសន្តិសុខ នៅក្នុងតំបន់ហ្កា ហ្សា និងមជ្ឈិមបូព៌ា ក៏ដូចជាការងាររបស់ UNRWA ជាទីភ្នាក់ងារអង្គការសហប្រជាជាតិសម្រាប់ជំនួយដល់ប្រជាជនប៉ាឡេស្ទីន»។

ក្រសួង បានបន្ថែមថា៖«កម្លាំងនេះ ត្រូវតែជាជំហានឆ្ពោះទៅរកការកសាងដំណោះស្រាយរដ្ឋពីរ» ដោយសំដៅទៅលើគំនិតនៃការនាំយកសន្តិភាព តាមរយៈការបង្កើតរដ្ឋប៉ាឡេស្ទីន ជាមួយអ៊ីស្រាអែលនៅលើទឹកដីដែលអ៊ីស្រាអែល បានកាន់កាប់ នៅក្នុងសង្រ្គាមឆ្នាំ ១៩៦៧។