សារព័ត៌មានរដ្ឋកូរ៉េខាងជើងរាយការណ៍ថា ប្រធានាធិបតីរុស្ស៊ីលោក Vladimir Putin បានកោតសរសើរ “ភាពក្លាហាន និងវីរភាព”របស់ទាហានកូរ៉េខាងជើង ក្នុងការដណ្តើមមកវិញតំបន់ Kursk របស់រុស្ស៊ី ពីកងកម្លាំងអ៊ុយក្រែន អំឡុងការជជែកគ្នាតាមទូរស័ព្ទជាមួយមេដឹកនាំកូរ៉េខាងជើងលោក Kim Jong Un ។

ទីភ្នាក់ងារព័ត៌មាន KCNA រាយការណ៍នៅថ្ងៃពុធនេះថា លោក Putinនិយាយប្រាប់លោក Kimថា លោកសូមស្ងើចសរសើរដល់ការគាំទ្រ និងស្មារតីពលីខ្លួនរបស់កូរ៉េខាងជើង ដែលត្រូវបានបង្ហាញដោយទាហានរបស់ពួកគេ អំឡុងការរំដោះតំបន់ភាគខាងលិច Kursk ។

KCNA រាយការណ៍ថា លោក Kimបានបង្ហាញការថ្លែងអំណរគុណអស់ពីដួងចិត្តចំពោះលោក Putin និងនិយាយថា ទីក្រុងព្យុងយ៉ាងនៅតែរក្សាភាពស្មោះត្រង់ចំពោះស្មារតីនៃកិច្ចព្រមព្រៀងការពារគ្នាទៅវិញទៅមកដែលត្រូវបានចុះហត្ថលេខាដោយភាគីទាំង ២កាលពីឆ្នាំមុន ក៏ដូចជាការគាំទ្រយ៉ាងពេញទំហឹងរាល់វិធានការទាំងអស់របស់ថ្នាក់ដឹកនាំរុស្ស៊ីនៅពេលអនាគត ។

KCNA រាយការណ៍ទៀតថា ប្រមុខរដ្ឋប្រទេសទាំង ២ បានផ្លាស់ប្តូរទស្សនៈលើបញ្ហាពាក់ព័ន្ធគ្នាទៅវិញទៅមក ។ លោក Kim និងលោក Putinបានឯកភាពគ្នាផងដែរ ក្នុងការប្រាស្រ័យទាក់ទងគ្នាកាន់តែជិតស្និតជាងមុននៅពេលអនាគត ។

ការជជែកគ្នាតាមទូរស័ព្ទនេះ ដែលកើតមានឡើងរយៈពេលប៉ុន្មានថ្ងៃប៉ុណ្ណោះ មុនពេលលោក Putinជួបប្រធានាធិបតីសហរដ្ឋអាមេរិកលោក Donald Trumpនៅរដ្ឋ Alaska ដើម្បីពិភាក្សាលើកិច្ចខិតខំបញ្ចប់សង្រ្គាមនៅអ៊ុយក្រែននោះ គឺជាសញ្ញាចុងក្រោយគេនៃការពង្រឹងទំនាក់ទំនងរវាងកូរ៉េខាងជើង និងរុស្ស៊ី ស្របពេលដែលទីក្រុងម៉ូស្គូ ឯកាលើឆាកអន្តរជាតិ ៕