​ម៉ូតូ​ទឹក៖ ក្រុម​កីឡា​ម៉ូតូ​ទឹក​ជម្រើសជាតិ​កម្ពុជាបានបញ្ចប់​ការប្រកួត​ពានរង្វាន់​ពិភពលោក​ Jet Ski World Cup and World Series 2021-2022 ​ជុំ​ទី​៣ ឬ​ជុំ​ផ្ដាច់ព្រ័ត្រនៅ​ប្រទេស​ថៃ​ហើយដោយ​ទទួលបាន​លទ្ធផល​មួយ​ដ៏​ល្អប្រសើរ ទោះ​មិនមាន​វត្តមាន​ម្ចាស់​មេដាយមាស​កីឡា​អាស៊ី សាលី អ៊ូ​មើ​ត ចូលរួម​ក៏ដោយ ពិសេស​កីឡាករ ម៉ី​ន មូ​ស្ដា​ន ដែល​ដណ្ដើមបាន​ចំណាត់ថ្នាក់​លេខ​២ ក្នុង​ព្រឹត្តិការណ៍​ពិភពលោក​នេះ។​

​ការប្រកួត​នេះបានចាប់ផ្ដើម​ពីថ្ងៃ​ទី​១២ ដល់​ថ្ងៃទី​១៦ ខែមករា​កន្លងទៅដោយមាន​កីឡាករ​ជើង​ខ្លាំង ៣​ទ្វីប​ជុំវិញ​ពិភពលោក​ចូលរួមក្នុងនោះ​ក៏មាន​វត្ដ​មាន​កីឡាករ​កម្ពុជា ៤​រូប​ផងដែរ បន្ទាប់ពី​កីឡាករ​ឆ្នើម សាលី អ៊ូ​មើ​ត ត្រូវបាន​ខកខានដោយសារ​បញ្ហា​របួស​ឆ្អឺ​ង​ខ្នង​ត្រូវធ្វើ​ការវះកាត់​បន្ទាន់។​ ​យ៉ាងណាក្ដី​ក្រុម​ជម្រើសជាតិ​ម៉ូតូ​ទឹក​កម្ពុជា ក៏​សម្រេចបាន​លទ្ធផល​ល្អប្រសើរ​មួយចំនួន​ផងដែររួមមាន​៖ កីឡាករ ម៉ី​ន មូ​ស្ដា​ន ដណ្ដើមបាន​ចំណាត់ថ្នាក់​លេខ​២ ខណៈ​កីឡាករ កៃ វ៉ាន់​ស៊ី​ដែន ទទួលបាន​ចំណាត់ថ្នាក់​លេខ​៤។ លើសពីនេះលោក​ Kevin Reiterer ​ក្នុងនាម​ជា​កីឡាករ​ផង និង​ជា​គ្រូបង្វឹក​អន្ដរជាតិ​របស់​ក្រុម​ជម្រើសជាតិ​កម្ពុជា​ផង ក៏បាន​ឈ្នះ​ពានរង្វាន់​ខ្ពស់បំផុតពី​ព្រឹត្តិការណ៍​នេះ​ផងដែរ។​

​ដោយឡែក​កីឡាករ ២​រូបនេះពុំបាន​បញ្ចប់​ការប្រកួត​របស់ខ្លួន​នោះទេរួមមាន​កីឡាករ សាលី ហ្វី​លីន ត្រូវបាន​រងរបួសអំឡុងពេល​ការប្រកួត​ពានរង្វាន់​ពិភពលោក​នេះ ដោយសារ​ឧបទ្ទវហេតុត្រូវ​បញ្ជូនទៅ​ព្យាបាលនៅ​មន្ទីរពេទ្យ និង​កីឡាករ ម៉ី​ន អូស្មាន ត្រូវបាន​ខកខាន​ប្រកួតដោយសារ​ម៉ូតូ​ទឹកមាន​បញ្ហា​គ្រឿង​ម៉ាស៊ីនត្រូវ​ផ្អាក​ការចូលរួម​ប្រកួត។​ ​សូមបញ្ជាក់ថា ព្រឹត្តិការណ៍​ Jet Ski World Cup and World Series 2021-2022 ​នេះបានធ្វើ​ការប្រកួត ៣​ជុំ​ធំៗតាំងពី​ចុងឆ្នាំ​២០២១ មកម្ល៉េះ ដោយ​ជុំ​ទី​១ ប្រកួត​នៅ​ប៉ូឡូញ និង​ជុំ​ទី​២ ប្រកួត​នៅ​អាមេរិក។ តែ​កីឡាករ​កម្ពុជាពុំបាន​ចូលរួម​នោះទេដោយសារ​បញ្ហា​កូ​វីដ​-១៩។ ដូច្នេះ​ការចូលរួម​ប្រកួត​ជុំ​ទី​៣ នៅ​ប្រទេស​ថៃ គ្រាន់តែ​ជា​ជ័យលាភី​សម្រាប់​ការប្រកួត​ក្នុង​ជុំ​ប៉ុណ្ណោះ ខណៈ​លទ្ធផល​ជារួម​ទាំង ៣​ជុំពុំ​ត្រូវបាន​គណៈកម្មការ​បូក​បញ្ចូល​នោះទេដោយសារ​ខ្វះ​ការប្រកួត ២​ជុំ​ដំបូង៕

​អត្ថបទ៖ លី ឈុន​ឡា