រុស្ស៊ីបានចាត់ទុកថា ជា «កិច្ចការមិនមានសារៈសំខាន់» អ្វីឡើយ សម្រាប់ការប្រឹក្សាយោបល់ការទូតរបស់អឺរ៉ុប ជាមួយអ៊ុយក្រែន នាថ្ងៃពុធ (ទី១៣ ខែសីហា) នេះ នៅមុនកិច្ចប្រជុំកំពូលដែលត្រូវបានគ្រោងទុក រវាងប្រធានាធិបតីអាមេរិក លោក Donald Trump និងប្រធានាធិបតីរុស្ស៊ី លោក Vladimir Putin នៅរដ្ឋ Alaska។

អ្នកនាំពាក្យរងក្រសួងការបរទេសរុស្ស៊ី លោក Alexey Fadeev បានប្រាប់នៅក្នុងសន្និសីទសារព័ត៌មានមួយថា៖ «យើងចាត់ទុកការពិគ្រោះយោបល់ដែលរៀបចំឡើងដោយអឺរ៉ុបថា ជារឿងមិនមានសារៈសំខាន់អ្វីឡើយ ទាំងផ្នែកនយោបាយ និងជាក់ស្តែង»។ លោកបានបន្ថែមថា៖ «អឺរ៉ុបគាំទ្រដោយសម្ដីដល់កិច្ចប្រឹងប្រែងការទូតរបស់ទីក្រុងវ៉ាស៊ីនតោន និងទីក្រុងមូស្គូ ដើម្បីដោះស្រាយវិបត្តិ ជុំវិញបញ្ហាអ៊ុយក្រែន ប៉ុន្តែតាមពិត សហភាពអឺរ៉ុបកំពុងបំផ្លាញដំណើរការនោះ»។

គួរបញ្ជាក់ថា ប្រធានាធិបតីអ៊ុយក្រែន លោក Volodymyr Zelenskyy និងបណ្ដាមេដឹកនាំអឺរ៉ុប នឹងជួបពិភាក្សាបន្ទាន់ជាមួយលោក Trump នៅថ្ងៃពុធនេះ ដោយសង្ឃឹមថា នឹងអាចបញ្ចុះបញ្ចូលលោកឲ្យជួយការពារផលប្រយោជន៍របស់ទីក្រុងគីវ អំឡុងកិច្ចប្រជុំកំពូលដែលកំពុងជិតកើតឡើង ជាមួយលោក Putin នៅថ្ងៃសុក្រចុងសប្ដាហ៍នេះ៕