យោធាអ៊ីស្រាអែល នៅថ្ងៃពុធ (ទី១៣ ខែសីហា) នេះ បានប្រាប់ឲ្យដឹងថា ខ្លួនបានយល់ព្រមលើ «ក្របខ័ណ្ឌ» សម្រាប់ការវាយលុកថ្មី នៅក្នុងតំបន់ហ្កាហ្សាស្ទ្រីប ដោយការសម្រេចនេះកើតមានឡើងតែប៉ុន្មានថ្ងៃបន្ទាប់ពីគណៈរដ្ឋមន្ត្រីសន្តិសុខ បានអំពាវនាវឲ្យមានការដណ្តើមកាន់កាប់ទីក្រុងហ្កាហ្សា។

សេចក្តីថ្លែងការណ៍មួយដែលចេញផ្សាយដោយកងទ័ព បានឲ្យដឹងថា ប្រមុខកងកម្លាំងប្រដាប់អាវុធ លោកឧត្តមសេនីយ៍ឯក Eyal Zamir «បានអនុម័តលើក្របខ័ណ្ឌដ៏សំខាន់ សម្រាប់ផែនការប្រតិបត្តិការរបស់ IDF (កងកម្លាំងការពារជាតិអ៊ីស្រាអែល) នៅតំបន់ហ្កាហ្សាស្ទ្រីប»។

រដ្ឋាភិបាលរបស់លោកនាយករដ្ឋមន្ត្រី Benjamin Netanyahu មិនបានផ្តល់ពេលវេលាច្បាស់លាស់នោះឡើយថា តើពេលណាដែលទាហានអ៊ីស្រាអែល នឹងចូលទៅក្នុងទីក្រុងដ៏ធំបំផុតរបស់ដែនដីនេះ ជាទីដែលមនុស្សរាប់ពាន់នាក់ បានភៀសខ្លួនទៅជ្រកកោន បន្ទាប់ពីរត់គេចពីការវាយលុក កាលពីមុន។

ទីភ្នាក់ងារការពារជនស៊ីវិលរបស់តំបន់ហ្កាហ្សា បានឲ្យដឹងថា ការវាយប្រហារតាមអាកាសរបស់អ៊ីស្រាអែលទៅលើទីក្រុងហ្កាហ្សា បានកើនឡើងកាន់តែខ្លាំង ក្នុងរយៈពេលប៉ុន្មានថ្ងៃថ្មីៗនេះ ដោយសង្កាត់លំនៅឋាន Zeitoun និង Sabra បានរងគ្រោះ «ដោយការវាយប្រហារតាមផ្លូវអាកាសយ៉ាងធ្ងន់ធ្ងរ ដែលដាក់គោលដៅលើផ្ទះសម្បែងជនស៊ីវិល ដែលអាចរួមមានទាំងអគារខ្ពស់ៗផងដែរ»។

ព័ត៌មាននៃការផ្ដល់ការយល់ព្រមរបស់យោធា លើផែនការនេះ កើតឡើងតែប៉ុន្មានម៉ោងបន្ទាប់ពីក្រុមហាម៉ាស បានប្រាប់ថា គណៈប្រតិភូជាន់ខ្ពស់បានទៅដល់ទីក្រុងគែរហើយ សម្រាប់ «ការពិភាក្សាបឋម» ជាមួយមន្ត្រីអេហ្ស៊ីប ស្តីពីបទឈប់បាញ់បណ្តោះអាសន្ន។

ផែនការរបស់រដ្ឋាភិបាលលោក Netanyahu ក្នុងការពង្រីកសង្រ្គាម នៅតំបន់ហ្កាហ្សា បន្ទាប់ពីមានការប្រយុទ្ធគ្នាអស់រយៈពេលជាង ២២ខែ បានបង្កឲ្យមានការតវ៉ាជាអន្តរជាតិ ព្រមទាំងការប្រឆាំងក្នុងស្រុកផងដែរ៕