រុស្ស៊ី បាននិយាយកាលពីថ្ងៃពុធ (១៣ សីហា) ថា ជំហររបស់ខ្លួនក្នុងការបញ្ចប់សង្រ្គាមអ៊ុយក្រែន គឺមិនផ្លាស់ប្តូរឡើយ ចាប់តាំងពីលោកប្រធានាធិបតីរុស្ស៊ី Vladimir Putin បានដាក់លក្ខខណ្ឌរបស់លោកកាលពីឆ្នាំមុនមក នោះគឺការដកទ័ពទាំងស្រុងរបស់អ៊ុយក្រែន ចេញឱ្យអស់ពីតំបន់សំខាន់ៗរបស់ខ្លួន ដែលទីក្រុងមូស្គូទាមទារសិទ្ធិគ្រប់គ្រង និងការបោះបង់ចោលនូវមហិច្ឆតាចូលអង្គការណាតូ។

លោក Putin និងប្រធានាធិបតីអាមេរិក លោក Donald Trump ត្រៀមជួបប្រជុំនាថ្ងៃសុក្រសប្ដាហ៍នេះ នៅរដ្ឋអាឡាស្កា ដែលជាជំនួបកំពូលលើកដំបូងរវាងអាមេរិក និងរុស្ស៊ី ចាប់តាំងពីឆ្នាំ ២០២១មក ដើម្បីពិភាក្សាពីកិច្ចប្រឹងប្រែងបញ្ចប់សង្រ្គាម។ លោក Trump បាននិយាយថា ភាគីទាំងពីរនឹងសុទ្ធតែត្រូវដោះដូរទឹកដីមួយចំនួនដែលពួកគេកាន់កាប់នាពេលបច្ចុប្បន្ន ដើម្បីធ្វើឱ្យសន្តិភាពកើតឡើង។

គួរឱ្យដឹងថា បច្ចុប្បន្ន រុស្ស៊ីគ្រប់គ្រង ១៩% នៃទឹកដីអ៊ុយក្រែន រួមទាំងឧបទ្វីបគ្រីម៉េ; ផ្នែកទាំងអស់នៃតំបន់ Luhansk; ច្រើនជាង ៧០% នៃតំបន់ Donetsk តំបន់ Zaporizhzhia និង Kherson; ហើយនិងផ្នែកមួយចំនួននៃតំបន់ Kharkiv, Sumy, Mykolaiv និង Dnipropetrovsk ។

នៅពេលត្រូវសាកសួរថាតើជំហររុស្ស៊ីផ្លាស់ប្តូរឬយ៉ាងណា អ្នកនាំពាក្យរងនៃក្រសួងការបរទេសរុស្ស៊ី លោក Alexei Fadeev បានឆ្លើយថា "ជំហររុស្ស៊ី នៅតែមិនផ្លាស់ប្តូរឡើយ ហើយត្រូវបញ្ជាក់យ៉ាងច្បាស់កាលពីជាងមួយឆ្នាំមុនមកម្ល៉េះនៅថ្ងៃទី១៤ ខែមិថុនា ឆ្នាំ២០២៤" ដោយសំដៅលើសុន្ទរកថាដែលលោក Putin បានថ្លែងនៅក្រសួងការបរទេស។

គួររម្លឹកថា នៅពេលនោះ លោក Putin បានកំណត់ការទាមទារជាច្រើន រួមទាំងការដកទ័ពអ៊ុយក្រែន ចេញពីផ្នែកនានានៃតំបន់ Donetsk, Zaporizhzhia និង Kherson។ ប្រមុខវិមានក្រឹមឡាំងរូបនេះក៏និយាយថា ក្រុងគីវ នឹងត្រូវជូនដំណឹងជាផ្លូវការដល់ក្រុងមូស្គូថា ខ្លួនបោះបង់ផែនការចូលរួមជាមួយសម្ព័ន្ធមិត្តយោធាណាតូ ហើយថា អ៊ុយក្រែនត្រូវរក្សាអព្យាក្រឹត និងមិនចូលបក្សសម្ព័ន្ធឡើយ៕