កម្មករ កសិករ និងនិស្សិតឥណ្ឌាកំពុងធ្វើបាតុកម្មនៅទូទាំងប្រទេសប្រឆាំងនឹងការគំរាមកំហែងពន្ធរបស់លោកប្រធានាធិបតីអាមេរិក Donald Trump កាលពីថ្ងៃពុធសប្ដាហ៍នេះ ។

វេទិកាសហជីពចម្រុះ រួមទាំងមជ្ឈមណ្ឌលសហជីពឥណ្ឌា (CITU) និងសហភាពកសិករ All India Kisan Sabha (AIKS) បានអំពាវនាវដល់ពលរដ្ឋស្នេហាជាតិទាំងអស់ឱ្យចូលរួមជាមួយអ្វីដែលហៅថាទិវាតស៊ូទូទាំងប្រទេស។

អង្គការនេះកំពុងទាមទារឱ្យក្រុង Delhi បដិសេធសម្ពាធពាណិជ្ជកម្មរបស់សហរដ្ឋអាមេរិក និងអះអាងសិទ្ធិអធិបតេយ្យភាពរបស់ខ្លួនក្នុងការធ្វើពាណិជ្ជកម្មជាមួយគ្រប់ប្រទេស។ 

លោក Inderjit Singh មេដឹកនាំសហភាពកសិករនៅទីក្រុង Rohtakនៃរដ្ឋ Haryana បាននិយាយថា ផ្នែកសំខាន់មួយ ដែលការនាំចូលរបស់ពួកគេនឹងត្រូវបោះចោលនៅទីនេះ នៅក្នុងប្រទេសឥណ្ឌា ភាគច្រើនជាផលិតផលទឹកដោះគោ ហើយប្រហែល៨០លាននាក់ នៃកសិករឥណ្ឌារបស់យើង គឺជាអ្នកផលិតទឹកដោះគោ ហើយផលិតផលទឹកដោះគោ និងទឹកដោះគោរបស់ពួកគេ នឹងលែងមាននៅក្នុងទីផ្សារឥណ្ឌាទៀត។ 

ការតវ៉ាបានកើតឡើងស្របពេលរដ្ឋាភិបាលក្រុងវ៉ាស៊ីនតោន គ្រោងនឹងដំឡើងពន្ធចំនួន ៥០ ភាគរយលើប្រទេសឥណ្ឌាជុំវិញការទិញប្រេងពីរុស្ស៊ី បន្ទាប់ពីកិច្ចចរចាពាណិជ្ជកម្មបរាជ័យចំនួន ៥ ជុំ។

ការតវ៉ានេះ ក៏ស្របពេលជាមួយនឹងរបាយការណ៍របស់សារព័ត៌មាន The Indian Express ដែលលើកឡើងថានាយករដ្ឋមន្ត្រីលោក Narendra Modi និងលោក Trump ទំនងនឹងជួបគ្នានៅខែក្រោយនៅ ក្រៅមហាសន្និបាតអង្គការសហប្រជាជាតិនៅទីក្រុងញូវយ៉ក៕