ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃពុធ (១៣ សីហា) ថា លោកនឹងស្វែងរកជំនួបបីផ្លូវជាមួយលោក Volodymyr Zelenskyy និងលោក Vladimir Putin ភ្លាមៗបន្ទាប់ពីជំនួបកំពូលនៅរដ្ឋអាឡាស្ការបស់លោកជាមួយមេដឹកនាំរុស្ស៊ីក្នុងបំណងបញ្ចប់សង្គ្រាមរយៈពេលបីឆ្នាំនៅអ៊ុយក្រែន។

លោក Trump បាននិយាយបន្ទាប់ពីអ្វីដែលលោកបានពិពណ៌នាថាជាការសន្ទនា «ល្អបំផុត» ជាមួយមេដឹកនាំអឺរ៉ុបរួមទាំងលោក Zelenskiy ទោះបីកងកម្លាំងរុស្ស៊ីបានរុលទៅមុខខ្លាំងបំផុតចូលទៅក្នុងប្រទេសរបស់ប្រធានាធិបតីអ៊ុយក្រែន ក្នុងរយៈពេលជាងមួយឆ្នាំចុងក្រោយនេះ។

លោក Trump បានប្រាប់អ្នកសារព័ត៌មាននៅពេលលោកត្រូវបានសួរអំពីជំនួបទល់មុខគ្នានៅទីក្រុង Anchorage រដ្ឋអាឡាស្កា ជាមួយសមភាគីរុស្ស៊ី ដែលគ្រោងធ្វើនៅថ្ងៃសុក្រស្អែកនេះថា «ប្រសិនបើជំនួបលើកដំបូងមានភាពប្រសើ នោះយើងនឹងមានជំនួបទីពីរយ៉ាងឆាប់រហ័ស»។ «ខ្ញុំនឹងធ្វើវាភ្លាមៗ ហើយយើងនឹងមានជំនួបលើកទីពីររវាងប្រធានាធិបតីលោក Putin និងប្រធានាធិបតី លោក Zelenskiy និងខ្លួនខ្ញុំផ្ទាល់ ប្រសិនបើពួកគេចង់ឱ្យខ្ញុំចូលរួមនៅទីនោះ»។ ជំនួបកំពូលកម្រិតខ្ពស់ធ្វើឡើងដោយ លោកTrump ព្យាយាមដើម្បីបញ្ចប់ជម្លោះ ហើយ លោកZelenskiy និងសម្ព័ន្ធមិត្តអឺរ៉ុបរបស់លោក បានស្នើឱ្យគណបក្សសាធារណរដ្ឋជំរុញឱ្យមានបទឈប់បាញ់។