ការតវ៉ា និងការបួងសួងបានធ្វើឡើងនៅជុំវិញពិភពលោក ដើម្បីគាំទ្រដល់ពលរដ្ឋប៉ាឡេស្ទីនដែលកំពុងរងទុក្ខលំបាកនៅតំបន់ហ្កាហ្សា និងដើម្បីឧទ្ទិសដល់វិញ្ញាណក្ខន្ធអ្នកសារព័ត៌មាន Al Jazeera បួនរូប និងអ្នកព័ត៌មានឯករាជ្យពីររូបដែលត្រូវបានសម្លាប់ដោយអ៊ីស្រាអែលនៅក្នុងតំបន់ហ៊ុមព័ទ្ធជាការសម្លាប់កំណត់គោលដៅដោយចេតនា កាលពីថ្ងៃអាទិត្យ។

អ្នកសារព័ត៌មាន និស្សិត សកម្មជន និងសមាជិកសង្គមស៊ីវិល ជាពិសេសនៅទីក្រុង Cape Town ប្រទេសអាហ្វ្រិកខាងត្បូង ទីក្រុងម៉ានីលប្រទេសហ្វីលីពីន និងទីក្រុងឡុងដ្រ៍ចក្រភពអង់គ្លេស បានធ្វើការតវ៉ាកាលពីថ្ងៃពុធអំពាវនាវឱ្យរដ្ឋាភិបាលរបស់ពួកគេដាក់សម្ពាធលើអ៊ីស្រាអែល ដើម្បីអនុញ្ញាតឱ្យប្រព័ន្ធផ្សព្វផ្សាយអន្តរជាតិចូលទៅក្នុងតំបន់ហ្កាហ្សា និងបញ្ចប់សង្រ្គាមប្រល័យពូជសាសន៍របស់អ៊ីស្រាអែលនៅទីនោះ។

កាលពីល្ងាចថ្ងៃអាទិត្យ អ្នកឆ្លើយឆ្លងព័ត៌មាន Al Jazeera ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ដែលបានកំណត់គោលដៅលើតង់ប្រព័ន្ធផ្សព្វផ្សាយរបស់ពួកគេ ដែលមានទីតាំងនៅជិតមន្ទីរពេទ្យ al-Shifa ក្នុងទីក្រុងហ្កាហ្សា។

សង្គ្រាមអ៊ីស្រាអែលនៅតំបន់ហ្កាហ្សាបានសម្លាប់មនុស្សយ៉ាងហោចណាស់ ៦១.៧២២នាក់ និងរងរបួស ១៥៤.៥២៥នាក់។ អ្នកសារព័ត៌មាន និងបុគ្គលិកប្រព័ន្ធផ្សព្វផ្សាយប៉ាឡេស្ទីនជិត២៧០នាក់ត្រូវបានសម្លាប់ដោយអ៊ីស្រាអែលចាប់តាំងពីសង្រ្គាមចាប់ផ្តើម។