ប្រជាជននៅទីក្រុងវ៉ាស៊ីនតោន បានតវ៉ានៅប៉ុស្តិ៍ត្រួតពិនិត្យរបស់នគរបាលកាលពីល្ងាចថ្ងៃពុធ ទី១៣ ខែសីហា ខណៈភាពតានតឹងនៅក្នុងរដ្ឋធានីរបស់សហរដ្ឋអាមេរិកមួយនេះកើនឡើងខ្ពស់ក្នុងពេលមានការបង្ក្រាបឧក្រិដ្ឋកម្មរបស់លោកប្រធានាធិបតី Donald Trump។ វីដេអូ បានបង្ហាញពីមនុស្សជាច្រើនកំពុងប្រមូលផ្តុំគ្នាតាមដងផ្លូវ ហើយស្រែកដាក់មន្ត្រីនគរបាលដែលកំពុងសណ្តោងរថយន្តមួយគ្រឿងចេញ។

ក្រុមបាតុករផ្សេងទៀត បានកាន់ផ្ទាំងបដាដែលមានអំណានថា «កម្លាំងអនុវត្តន៍ច្បាប់គយ និងអន្តោប្រវេសន៍សហរដ្ឋអាមេរិក(ICE) នៅខាងមុខ» ហើយបានព្យាយាមណែនាំយានយន្តដែលមកដល់ឱ្យចេញឆ្ងាយពីប៉ុស្តិ៍ត្រួតពិនិត្យ។

លោក Trump បានគូររូបភាពរដ្ឋធានីរបស់សហរដ្ឋអាមេរិក ជាទីក្រុងមួយដែលញាំញីដោយរលកនៃឧក្រិដ្ឋកម្ម និងអ្នកគ្មានផ្ទះសម្បែងរាលដាល ទោះបីជាទាំងស្ថិតិឧក្រិដ្ឋកម្មទីក្រុងនិងសហព័ន្ធ បង្ហាញថា ឧក្រិដ្ឋកម្មហិង្សាបានធ្លាក់ចុះយ៉ាងគំហុកចាប់តាំងពីការកើនឡើងក្នុងឆ្នាំ២០២៣ ក៏ដោយ។

លោក Trump បានប្រកាសកាលពីថ្ងៃចន្ទថាលោកកំពុងដាក់ពង្រាយកងទ័ពឆ្មាំជាតិចំនួន៨០០នាក់ទៅកាន់ទីក្រុងនេះ ជាយុទ្ធសាស្ត្រមួយដែលលោកបានប្រើនៅក្នុងទីក្រុង Los Angeles កាលពីខែមិថុនា នៅពេលដែលលោកបានដាក់ពង្រាយទាហានឆ្មាំជាតិ និងទាហានម៉ារីនអាមេរិករាប់ពាន់នាក់ ជុំវិញការជំទាស់របស់មន្ត្រីរដ្ឋនិងតំបន់ ក្នុងការឆ្លើយតបទៅនឹងការតវ៉ាចំពោះការឆ្មក់បង្ក្រាបរបស់រដ្ឋបាលលោក។