ចំហេះព្រៃដ៏កម្រោល ដែលបង្កឡើងដោយអ្នកលួចដុតដោយចេតនា ឬដោយសារកម្លាំងរន្ទះបាញ់ ហើយឆាបឆេះកាន់តែអាក្រក់ឡើងក្រោមរលកកម្ដៅកំណាច និងខ្យល់បក់ខ្លាំងក្លា បានបង្កការបំផ្លិចបំផ្លាញនៅទូទាំងទ្វីបអឺរ៉ុបភាគខាងត្បូង កាលពីថ្ងៃពុធ (១៣ សីហា) ដោយបានដុតបំផ្លាញលំនៅឋាន និងបង្ខំអ្នកស្រុក និងអ្នកទេសចររាប់ពាន់នាក់ឱ្យភៀសខ្លួន។

យោងតាមមជ្ឈមណ្ឌលស្រាវជ្រាវរួមរបស់មជ្ឈមណ្ឌលវិទ្យាសាស្ត្រសហភាពអឺរ៉ុប បានឱ្យដឹងថា ចំហេះព្រៃបានប៉ះពាល់ដល់ផ្ទៃដីជិត ៤៤០.០០០ហិចតា នៅក្នុងតំបន់ចាយប្រាក់អឺរ៉ូ រហូតមកដល់ពេលនេះនៅក្នុងឆ្នាំ២០២៥ ពោលគឺកើនទ្វេដងបើធៀបនឹងពេលដូចគ្នានៃឆ្នាំ ដែលចាប់តាំងពីឆ្នាំ២០០៦មក។

ស្របពេលកម្ដៅគ្របសង្កត់អឺរ៉ុបខាងត្បូង អាជ្ញាធរក្រិកបានប្រាប់អ្នកស្រុក និងអ្នកទេសចរនៅលើប្រជុំកោះ Chios និងតំបន់មួយចំនួនទៀត ឱ្យផ្លាស់ទៅកន្លែងសុវត្ថិភាព ខណៈភ្លើងរាលដាលជិតដល់។ មនុស្សមួយចំនួនបានស្លាប់នៅអេស្ប៉ាញ អាល់បានី និងទួរគី ជាមួយនឹងមនុស្សរាប់សិបនាក់ទៀត រួមទាំងអ្នកពន្លត់អគ្គីភ័យ ត្រូវបញ្ជូនទៅមន្ទីរពេទ្យដោយស្រូបផ្សែងខ្លាំងពេក និងរបួសរលាក។

ចំហេះនៅតំបន់ Trancoso ក្នុងប្រទេសព័រទុយហ្គាល់ ដែលឆាបឆេះតាំងតែពីថ្ងៃសៅរ៍សប្ដាហ៍មុនមក បានកើនកម្លាំងកាន់តែអាក្រក់ទៅៗ។ សីតុណ្ហភាពដ៏ក្ដៅគគុកវិញក៏បានកើនលើស ៤០អង្សាសេ នៅក្នុងទីតាំងជាច្រើននៅដើមសប្តាហ៍នេះ ជាមួយនឹងសីតុណ្ហភាពកម្រិតកំណត់ត្រា បានវាយប្រហារប្រទេសបារាំង និងស្លូវេនី៕