រដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៊ីស្រាអែល Bezalel Smotrich បាននិយាយកាលពីថ្ងៃពុធថា លោកបានអនុម័តការសាងសង់ផ្ទះចំនួន ៣.៤០១ខ្នង សម្រាប់អ្នកតាំងលំនៅ នៅក្នុងតំបន់ដ៏ចម្រូងចម្រាស មួយនៃតំបន់វេសបែង (West Bank)។

លំនៅឋានទាំងនោះ នឹងត្រូវបានសាងសង់ នៅក្នុងតំបន់ E1 ដែលជាដីលាតសន្ធឹងនៅភាគខាងកើតនៃទីក្រុងហ្ស៊េរុយសាឡឹមរវាងទីក្រុងនិងកន្លែងតាំងទីលំនៅ Ma'ale Adumim។ ការសាងសង់ផ្ទះនៅទីនោះ ត្រូវបានគេមើលឃើញថា មានភាពចម្រូងចម្រាសជាពិសេស ព្រោះវានឹងកាត់ផ្តាច់ក្រុងហ្ស៊េរុយសាឡឹមខាងកើត ចេញពីភាគខាងជើងនៃតំបន់វេសបែង។ ផែនការសាងសង់នៅក្នុងតំបន់ E1 ត្រូវបានជាប់គាំងអស់ជាច្រើនឆ្នាំ ដែលភាគច្រើន ដោយសារតែការប្រឆាំងពីអន្តរជាតិ។

លោក Smotrich មេដឹកនាំគណបក្សគាំទ្រអ្នកតាំងលំនៅមួយ នៅក្នុងរដ្ឋាភិបាលចម្រុះដែលកំពុងកាន់អំណាចរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា វិធានការនេះ ក៏មានគោលបំណងទប់ស្កាត់ការបង្កើតរដ្ឋប៉ាឡេស្ទីនផងដែរ។

លោកបាននិយាយនៅក្នុងសេចក្តីថ្លែងការណ៍មួយថា៖«ការអនុម័តផែនការសាងសង់នៅក្នុងតំបន់ E1    បញ្ចប់គំនិតនៃការបង្កើតរដ្ឋប៉ាឡេស្ទីន ហើយបន្តជំហានជាច្រើនដែលយើងកំពុងអនុវត្តនៅក្នុងទឹកដី ដែលជាផ្នែកមួយនៃផែនការអធិបតេយ្យភាពជាក់ស្តែង ដែលយើងបានចាប់ផ្តើមអនុវត្តជាមួយនឹងការបង្កើតការគ្រប់គ្រងតំបន់នេះ»។