សារព័ត៌មាន Sky News បានរាយការណ៍ដោយដកស្រង់ប្រភពរបស់គណៈកម្មការអឺរ៉ុបថា សហភាពអឺរ៉ុប (EU)កំពុងវាយតម្លៃលទ្ធភាពនៃការបន្ធូរបន្ថយជាបន្តបន្ទាប់នូវទណ្ឌកម្មប្រឆាំងរុស្ស៊ី ប៉ុន្តែប្រសិនបើបទឈប់បាញ់នៅអ៊ុយក្រែន ត្រូវបានព្រមព្រៀងគ្នា។

ប្រភពបានសម្តែងក្តីសង្ឃឹមថា បទឈប់បាញ់ដំបូងរយៈពេល ១៥ថ្ងៃ អាចត្រូវបានសម្រេចភ្លាមៗ ហើយត្រូវបានអនុវត្តដោយការផ្អាកការប្រយុទ្ធគ្នាឲ្យបានកាន់តែយូរ។ យោងតាមពួកគេ ការបន្ធូរបន្ថយមួយផ្នែកនៃទណ្ឌកម្ម នឹងអាចធ្វើទៅបាន នៅពេលដែលដំណាក់កាលទី ២ ចាប់ផ្តើម ប៉ុន្តែផែនការសម្រាប់ការដាក់ទណ្ឌកម្ម នឹងត្រូវអនុវត្តឡើងវិញភ្លាមៗ ប្រសិនបើមានការរំលោភលើបទឈប់បាញ់ណាមួយ កើតឡើង។

ដោយឡែក សារព័ត៌មាន Sky News បានដកស្រង់ប្រភពរដ្ឋាភិបាលអ៊ីតាលី ដែលបង្ហាញពីក្តីសង្ឃឹមថា អឺរ៉ុបនឹងចូលរួមក្នុងកិច្ចពិភាក្សារបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ជាមួយសមភាគីអាមេរិក លោក ដូណាល់ ត្រាំ។ ប្រភពបាននិយាយទៀតថា ប្រធានបទនេះ ត្រូវបានលើកឡើង ក្នុងអំឡុងពេលសន្ទនារបស់លោក ត្រាំ ជាមួយមេដឹកនាំអឺរ៉ុប ដែលបានធ្វើឡើង កាលពីថ្ងៃទី ១៣ ខែសីហា។

កាលពីថ្ងៃទី ០៨ ខែសីហា លោក ត្រាំ បានប្រកាសថា លោកសង្ឃឹមថា នឹងជួបជាមួយលោក ពូទីន នៅរដ្ឋ Alaska នៅថ្ងៃទី ១៥ ខែសីហា។ ក្រោយមកជំនួយការប្រធានាធិបតីរុស្ស៊ីលោក Yury Ushakov បានបញ្ជាក់ពីពេលវេលា និងទីកន្លែងនៃកិច្ចប្រជុំកំពូលនាពេលខាងមុខ។ លោកបានលើកឡើងថា ការពិភាក្សា ត្រូវបានគេរំពឹងថា នឹងផ្តោតលើការស្វែងរកជម្រើសសម្រាប់ដំណោះស្រាយសន្តិភាពរយៈពេលវែង នៅអ៊ុយក្រែន។ កិច្ចពិភាក្សានេះ នឹងក្លាយជាជំនួបផ្ទាល់លើកដំបូងរវាងមេដឹកនាំរុស្ស៊ី និងសហរដ្ឋអាមេរិក ចាប់តាំងពីលោក ត្រាំ ត្រឡប់មកកាន់តំណែងសេតវិមានវិញ ក្នុងខែមករា ឆ្នាំ ២០២៥។