បន្ទាប់ពីគណៈរដ្ឋមន្ត្រី បានអនុម័តគោលដៅនៃផែនទីបង្ហាញផ្លូវគាំទ្រដោយសហរដ្ឋអាមេរិក ដើម្បីរំសាយអាវុធរបស់ក្រុមហេសបូឡាដែលមានសម្ព័ន្ធភាពជាមួយអ៊ីរ៉ង់ កាលពីថ្ងៃពុធ (ទី១៣ ខែសីហា) ប្រធានាធិបតីលីបង់ បានប្រាប់មន្ត្រីជាន់ខ្ពស់អ៊ីរ៉ង់ដែលកំពុងធ្វើទស្សនកិច្ចថា គ្មានក្រុមណាមួយ នៅក្នុងប្រទេសលីបង់ ត្រូវបានអនុញ្ញាតឲ្យមានអាវុធ ឬទទួលការគាំទ្រពីបរទេសឡើយ។

អំឡុងកិច្ចប្រជុំនៅទីក្រុងបេរូត ជាមួយលោក Ali Larijani លេខាធិការនៃស្ថាប័នសន្តិសុខជាន់ខ្ពស់របស់អ៊ីរ៉ង់ លោក Joseph Aoun បានព្រមានប្រឆាំងនឹងការជ្រៀតជ្រែកពីបរទេសក្នុងកិច្ចការផ្ទៃក្នុងរបស់លីបង់ ដោយប្រាប់ថា ប្រទេសនេះបើកចំហ សម្រាប់កិច្ចសហប្រតិបត្តិការជាមួយអ៊ីរ៉ង់ ប៉ុន្តែមានតែនៅក្នុងព្រំដែននៃអធិបតេយ្យភាពជាតិ និងការគោរពគ្នាទៅវិញទៅមកប៉ុណ្ណោះ។

ចំណែកលោក Larijani បាននិយាយថា សាធារណរដ្ឋឥស្លាមគាំទ្រអធិបតេយ្យភាពរបស់លីបង់ ហើយមិនជ្រៀតជ្រែកក្នុងការសម្រេចរបស់ប្រទេសនេះឡើយ។ 

បន្ទាប់ពីមានកិច្ចពិភាក្សាដាច់ដោយឡែកជាមួយប្រធានសភា លោក Nabih Berri ដែលចលនា Amal របស់លោក ជាសម្ព័ន្ធមិត្តរបស់ក្រុមហេសបូឡា លោក Larijani បានបញ្ជាក់ថា៖ «ការសម្រេចណាមួយដែលធ្វើឡើងដោយរដ្ឋាភិបាលលីបង់ ក្នុងការពិគ្រោះយោបល់ជាមួយនឹងការតស៊ូត្រូវបានគោរពដោយពួកយើង»៕