តុងហ្គា៖ តាមរយៈវីដេអូថតពីលើអាកាសបញ្ចេញដោយយោធាណូវ៉ែលហ្ស៊េឡង់ កម្ទេចផេះភ្នំភ្លើងយ៉ាងក្រាស់កំពុងគ្របដណ្ដប់លើលំនៅឋានជាច្រើនខ្នង និងចម្ការបន្លែនៅលើប្រទេសតុងហ្គា ដែលជាកោះស្ថិតនៅតំបន់មហាសមុទ្រប៉ាស៊ីហ្វិក។ យោងតាមអ្នកសម្របស្រួលកម្មវិធីរបស់អង្គការសហប្រជាជាតិ នៅក្នុងតំបន់ប៉ាស៊ីហ្វិកមនុស្ស ៣នាក់បានស្លាប់ក្រោយការផ្ទុះភ្នំភ្លើងនៅក្នុងប្រទេសតុងហ្គាកាលពីថ្ងៃសៅរ៍។
យោងតាមរបាយការណ៍របស់កោះនេះបាននិយាយថា ស្ត្រីជនជាតិអង់គ្លេសជាបុគ្គលិកអង្គការសប្បុរសធម៌ម្នាក់ ត្រូវបានរកឃើញថាបានស្លាប់ក្រោយបានបាត់ខ្លួន បន្ទាប់ពីកាផ្ទុះភ្នំភ្លើងក្រោមទឹកដ៏ធំបង្កើតឲ្យមានការរញ្ជួយដីកម្រិត ៧.៤រ៉ិចទ័រ និងបង្កជារលកយក្សស៊ូណាមិវាយប្រហារតំបន់ឆ្នេរបស់កោះនេះ និងរាលដាលដល់ប្រទេសជាច្រើនទៀត។ កម្ទេចផេះដែលកំពុងគ្របដណ្ដប់ផ្លូវរត់យន្តហោះ កំពុងពន្យារពេលការដឹកជញ្ជូនជំនួយទៅកាន់ប្រទេសតុងហ្គា ជាទីដែលការខូចខាតធ្ងន់ធ្ងរត្រូវគេរាយការណ៍ប៉ុន្មានថ្ងៃបន្ទាប់ពីការផ្ទុះនៅបាតសមុទ្រដ៏ធំ និងរលកយក្សស៊ូណាមិ។
យោធាណូវែលហ្ស៊េឡង់កំពុងដឹកជញ្ជូនជំនួយចាំបាច់បំផុត ដូចជាទឹកស្អាតសម្រាប់ទទួលទាន និងសម្ភារផ្គត់ផ្គង់ផ្សេងទៀត ប៉ុន្តែបាននិយាយថា ការដឹកជញ្ជូនជំនួយនឹងត្រូវពន្យាពេលយ៉ាងហោចណាស់ ១ថ្ងៃទៀតដោយសារកម្ទេចផេះភ្នំភ្លើងគ្របដណ្ដប់លើផ្លូវរត់របស់យន្តហោះ។ រលកយក្សស៊ូណាមិនកម្ពស់ប្រហែល ៨០សង់ទីម៉ែត្របានវាយប្រហារតំបន់ឆ្នេរសមុទ្ររបស់ប្រទេសតុងហ្គា និងទូទាំងតំបន់សមុទ្រប៉ាស៊ីហ្វិក ដែលបណ្ដាលឲ្យខូចខាតតិចតួចចាប់ពីប្រទេសណូវែលហ្ស៊េឡង់ដល់ទីក្រុង Santa Cruz ដែលជាទីក្រុងធំបំផុតរបស់រដ្ឋ California សហរដ្ឋអាមេរិក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
