ប្រធានាធិបតីអ៊ីរ៉ង់លោក Masoud Pezeshkian បានរិះគន់ការលើកឡើងរបស់នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ( Benjamin Netanyahu) អំពីការត្រៀមខ្លួនរបស់រដ្ឋជ្វីហ្វ ក្នុងការជួយសាធារណរដ្ឋឥស្លាម ក្នុងការដោះស្រាយបញ្ហាផ្គត់ផ្គង់ទឹករបស់ខ្លួន។

លោកបានសរសេរនៅលើបណ្តាញសង្គម X ថា៖«របបមួយដែលបានផ្តាច់ទឹក និងអាហារ នៅតំបន់ហ្កាហ្សា ឥឡូវនេះ និយាយថា ខ្លួននឹងនាំយកទឹកមកឲ្យប្រទេសអ៊ីរ៉ង់។ នេះគឺគ្រាន់តែជាការបោកប្រាស់ប៉ុណ្ណោះ ពុំមានអ្វីលើសពីនេះទេ។

កាលពីថ្ងៃអង្គារ នាយករដ្ឋមន្ត្រីអ៊ីស្រាអែល បានថតវីដេអូសុន្ទរកថា ទៅកាន់ប្រជាជនអ៊ីរ៉ង់ ដោយក្នុងនោះលោកបានអំពាវនាវឲ្យប្រជាជនអ៊ីរ៉ង់ក្រោកឡើង ធ្វើបះបោរប្រឆាំងនឹងសាធារណរដ្ឋឥស្លាម ដោយសន្យាជួយពួកគេ ក្នុងការដោះស្រាយបញ្ហាផ្គត់ផ្គង់ទឹក។ តាមការលើកឡើងរបស់លោក ណេតាន់យ៉ាហ៊ូ អ៊ីរ៉ង់កំពុងជួបប្រទះការខ្វះខាតទឹកយ៉ាងធ្ងន់ធ្ងរ ហើយរដ្ឋជ្វីហ្វអាចជួយប្រជាជនអ៊ីរ៉ង់ ក្នុងការកែច្នៃ និងធ្វើទឹកស្អាតសម្រាប់ប្រើប្រាស់។