ក្រុមហ៊ុនអាកាសចរណ៍ AirAsia ដែលជាក្រុមហ៊ុនអាកាសចរណ៍តម្លៃទាប មានមូលដ្ឋាននៅប្រទេសម៉ាឡេស៊ី កំពុងរងការរិះគន់ បន្ទាប់ពីជើងហោះហើរទៅពីអាកាសយានដ្ឋានអន្តរជាតិ Kuala Lumpur បានចុះចតនៅអាកាសយានដ្ឋានអន្តរជាតិ Gimpo នៅប្រទេសកូរ៉េខាងត្បូង ដែលជាការផ្ទុយពីគោលដៅគ្រោងទុក នៅអាកាសយានដ្ឋាន Incheon។

ដោយដំបូងឡើយគ្រោងទៅដល់ទីក្រុង Incheon វេលាម៉ោង ៧:៥០យប់ (ម៉ោងក្នុងស្រុក) នៅថ្ងៃទី១៣ ខែសីហា ជើងហោះហើរលេខ D7 506 របស់ក្រុមហ៊ុន AirAsia ត្រូវបានគេរាយការណ៍ថា បានចុះចតនៅអាកាសយានដ្ឋាន ក្នុងទីក្រុង Gimpo ចម្ងាយ ២៥គីឡូម៉ែត្រពីទីក្រុង Incheon នៅម៉ោង ៨:០៨យប់ បន្ទាប់ពីហោះឆ្វែលក្រឡឹងនៅលើអាកាស។

យោងតាមអ្នកដំណើរនៅលើជើងហោះហើរនេះ បានឲ្យដឹងថា បន្ទាប់ពីកាពីតែន បានប្រកាសថា ពួកគេបានទៅដល់ទីក្រុង Incheon ហើយ មនុស្សម្នាបានក្រោកឈរឡើងយកកាបូបរបស់ពួកគេចេញពីយន្តហោះ ប៉ុន្តែមានអ្នកខ្លះមើលទៅខាងក្រៅបង្អួច និងទូរសព្ទរបស់ពួកគេ ទើបដឹងថា ពួកគេកំពុងស្ថិតនៅទីក្រុង Gimpo។

យោងតាមសាជីវកម្មអាកាសយានដ្ឋានកូរ៉េ បានឲ្យដឹងថា អ្វីដែលបណ្តាលឲ្យជើងហោះហើរបង្វែរទៅចុះចតនៅទីក្រុង Gimpo គឺដោយសារ «ភាពច្របូកច្របល់» នៅអាកាសយានដ្ឋាន Incheon ជាកន្លែងដែលយន្តហោះបានចាក់សាំងមុនពេលចេញដំណើរទៅកាន់ទីក្រុង Incheon ប្រហែល ២ម៉ោងក្រោយមក នៅម៉ោង ១០:១៧យប់។

បើតាមស្ត្រីអ្នកដំណើរម្នាក់ បានឲ្យដឹងថា កាពីតែន និងបុគ្គលិកនៃជើងហោះហើរនេះ បានសុំអភ័យទោស ដោយសារបញ្ហាប្រព័ន្ធប្រកាសសាធារណៈ នៅពេលដែលយន្តហោះបានចេញដំណើរទៅកាន់ទីក្រុង Incheon ជាកន្លែងដែលយន្តហោះចុះចតនៅម៉ោង ១០:៥៩យប់។ អ្នកដំណើរមួយចំនួន បានរិះគន់ក្រុមហ៊ុនអាកាសចរណ៍ថា មិនបានផ្តល់ការពន្យល់ឲ្យបានច្បាស់លាស់អំពីស្ថានភាពនេះ៕