មន្រ្តីមួយរូបនិយាយនៅថ្ងៃព្រហស្បតិ៍នេះថា មនុស្សយ៉ាងហោច ១២នាក់ ត្រូវបានគេសង្ស័យថា ស្លាប់ ហើយមនុស្សជាច្រើននាក់ផ្សេងទៀត ជាប់ខ្លួន បន្ទាប់ពីភ្លៀងធ្លាក់ខ្លាំងយ៉ាងគំហុកវាយប្រហារនៅតំបន់កាស្មៀ ប្រទេសឥណ្ឌា ។

គ្រោះមហន្តរាយធម្មជាតិនេះ បានវាយប្រហារភូមិ Chasoti តាមផ្លូវទៅកាន់ព្រះវិហារ Machail Mata កាលពីវេលាម៉ោង ១២ថ្ងៃត្រង់ និងម៉ោង ១រសៀល ពេលដែលមនស្សយ៉ាងច្រើន បានជួបជុំគ្នានៅទីសក្ការៈបូជា Machail Mata ។ 

ភូមិ Chasoti ស្ថិតនៅលើរយៈកម្ពស់ជិត ៣ពាន់ម៉ែត្រពីលើនីវ៉ូទឹកសមុទ្រ និងមានចម្ងាយប្រហែល ៩០គ.មពីទីក្រុង Kishtwar ។ អាហារត្រូវបានរៀបចំឡើងសម្រាប់ក្រុមអ្នកគោរពបូជា ពេលដែលព្យុះភ្លៀងបង្កឲ្យកើតមានទឹកជំនន់ដ៏គំហុក ។

លោក Jitendra Singh គឺជារដ្ឋមន្រ្តីសហព័ន្ធប្រចាំតំបន់កាស្មៀ និយាយថា លោកបាននិយាយទៅកាន់ស្នងការរងក្រុង Kishtwar លោក Pankaj Kumar Sharma ក្រោយទទួលបានការជូនដំណឹងអាសន្នពីមេដឹកនាំក្រុមប្រឆាំងនៅដែនដីចាមមូ និងកាស្មៀ ។

លោក Jitendra បាននិយាយនៅក្នុងសារបង្ហោះលើបណ្តាញព័ត៌មានសង្គម Xថា ព្យុះភ្លៀងដ៏ខ្លាំងមួយ បានវាយប្រហារភូមិ Chositi បណ្តាលឲ្យមានគ្រោះថ្នាក់ដល់អាយុជីវិតមនុស្ស ។ ភ្លាមៗនោះ រដ្ឋបាលក្នុងស្រុក បានចាត់វិធានការភ្លាមៗ ហើយក្រុមជួយសង្រ្គោះ បានធ្វើដំណើរទៅកាន់កន្លែងកើតហេតុ ។ ការវាយតម្លៃផលខូចខាត និងការរៀបចំគ្រប់គ្រងវេជ្ជសាស្រ្ត និងជួយសង្រ្គោះ ត្រូវបានធ្វើឡើង ៕