នៅថ្ងៃព្រហស្បតិ៍នេះ ព្យុះត្រូពិក Podul បាននាំមកនូវភ្លៀងធ្លាក់ខ្លាំងនៅតំបន់ភាគខាងត្បូងប្រទេសចិន ដែលនៅមិនទាន់ងើបរួចឡើងវិញពីភ្លៀងធ្លាក់ខ្លាំងកាលពីសប្តាហ៍មុន និងបានបង្កផលរំខានដល់មន្ទីរពេទ្យ សាលារៀន និងតុលាការ នៅទីក្រុងហុងកុង ក្រោយវាយប្រហារកោះតៃវ៉ាន បណ្តាលឲ្យមនុស្ស ១៤៣នាក់ រងរបួស ។

សវនាការរបស់មហាសេដ្ឋីហុងកុងលោក Jimmy Lai ត្រូវបានលុបចោល ក្រោយក្រុមអាជ្ញាធរ ប្រកាសអាសន្នព្យុះភ្លៀងកម្រិតខ្ពស់បំផុត ស្របពេលដែលក្រុមអ្នកគាំទ្រលោក នាំគ្នាតម្រង់ជួរកាន់ឆ័ត្រនៅក្រៅអគារតុលាការ ។ មន្ទីរពេទ្យ និងសាលារៀន បានបិទទ្វារផងដែរនៅថ្ងៃព្រហស្បតិ៍នេះ ។

ខណៈពេលនោះដែរ អាកាសយានដ្ឋាននៅទូទាំងតំបន់ បានរាយការណ៍ពីអត្រាលុបចោលជើងហោះហើរប្រហែល ២០ភាគរយនៅព្រឹកនេះ ពេលដែលព្យុះ Podul បោកបក់លើតំបន់ជាច្រើននៅខេត្ត Guangdong, Hunan និងខេត្ត Jiangxi ក្នុងនោះភ្លៀងធ្លាក់កម្ពស់ ៧០មីលីម៉ែត្រក្នុង ១ម៉ោង ត្រូវបានរកឃើញ ។

១ភាគ៣នៃជើងហោះហើរទៅកាន់ទីក្រុង Quanzhou ដែលជាមជ្ឈមណ្ឌលនាំចេញវាយនភណ្ឌ ស្បែកជើង និងសម្លៀកបំពាក់ដ៏សំខាន់ ត្រូវបានលុបចោល ក្នុងនោះក្រុមអ្នកជំនាញ បានព្រមានពីស្ថានភាពអាកាសធាតុអាក្រក់បង្កការគំរាមកំហែងដល់កំណើននៅក្នុងប្រទេសមហាអំណាចសេដ្ឋកិច្ចធំបំផុតលំដាប់ទី ២របស់ពិភពលោកមួយនេះ ។

ប្រទេសចិនបានមើលឃើញភ្លៀងធ្លាក់ខ្លាំងជាប់កំណត់ត្រានៅតំបន់ភាគខាងជើង និងតំបន់ភាគខាងត្បូង ក៏ដូចជារលកកម្តៅរយៈពេលយូរ ។ នៅថ្ងៃព្រហស្បតិ៍នេះ រដ្ឋាភិបាលចិន បានប្រកាសមូលនិធិថ្មី ៥៩,៩លានដុល្លារ សម្រាប់ជំនួយគ្រោះមហន្តរាយ ៕