ទីភ្នាក់ងារសារព័ត៌មាន SANA របស់ប្រទេសស៊ីរី បានរាយការណ៍កាលពីថ្ងៃពុធថា អាជ្ញាធរស៊ីរី និងលីបង់ បានព្រមព្រៀងគ្នាលើជំហាន ដើម្បីសម្រួលដល់ការដឹកជញ្ជូនទំនិញ និងការធ្វើដំណើរបស់ប្រជាជនឆ្លងកាត់ព្រំដែនរួមគ្នារបស់ពួកគេ ក្នុងគោលបំណងជំរុញពាណិជ្ជកម្មរវាងប្រទេសទាំងពីរ ដែលរងគ្រោះដោយវិបត្តិ។

របាយការណ៍បានឲ្យដឹងថា តំណាងគណៈកម្មាធិការបច្ចេកទេសចម្រុះលីបង់-ស៊ីរី សម្រាប់ការដឹកជញ្ជូនតាមផ្លូវគោក បានយល់ព្រមកាត់បន្ថយពន្ធគយលើយានយន្ត និងរថយន្តដឹកទំនិញ ឆ្លងកាត់ព្រំដែនគោក ហើយសិក្សាពីលទ្ធភាពនៃការលើកលែងរថយន្តដឹកទំនិញ និងរថយន្តដឹកជញ្ជូនសាធារណៈពីថ្លៃចូល និងចេញ។

គណៈកម្មាធិការនេះ ក៏បានគូសបញ្ជាក់ពីតម្រូវការ ក្នុងការអនុវត្តកិច្ចព្រមព្រៀងឆ្នាំ ១៩៩៣ ដែលគ្រប់គ្រង និងលើកកម្ពស់ការដឹកជញ្ជូនមនុស្ស និងទំនិញឆ្លងកាត់ព្រំដែន។

ការសម្រេចចិត្តនេះ បានធ្វើឡើងបន្ទាប់ពីកិច្ចប្រជុំរយៈពេលពីរថ្ងៃ នៅទីក្រុងដាម៉ាសស្តីពីការគ្រប់គ្រងចរាចរណ៍តាមព្រំដែន ដែលបានបញ្ចប់កាលពីថ្ងៃពុធ។ កិច្ចពិភាក្សានេះ គឺជាផ្នែកមួយនៃកិច្ចខិតខំប្រឹងប្រែង ដើម្បីជួយសម្រួលដល់ការដឹកជញ្ជូនទំនិញ និងអ្នកដំណើរ តាមរយៈការដកចេញនូវរបាំងផ្សេងៗ ការពង្រឹងការផ្លាស់ប្តូរសេដ្ឋកិច្ច និងការសម្របខ្លួនទៅនឹងការអភិវឌ្ឍក្នុងតំបន់ និងពាណិជ្ជកម្ម។