ក្រុមអ្នកស៊ើបអង្កេតអេស្ប៉ាញ នៅថ្ងៃព្រហស្បតិ៍ (ទី១៤ ខែសីហា) នេះ បានប្រាប់ឲ្យដឹងថា ពួកគេបានចាប់ខ្លួនមនុស្ស ៤នាក់ ដែលសង្ស័យថា បានបង្កឲ្យមានចំហេះព្រៃ ដោយធ្វើឲ្យចំនួនជនជាប់ចោទសរុបឡើងដល់ ៣០នាក់ហើយ នៅរដូវក្តៅនេះ។

ឆ្មាំស៊ីវិលបានប្រាប់ថា ការចាប់ខ្លួន ៣នាក់ចុងក្រោយបំផុត គឺនៅភាគពាយ័ព្យតំបន់ Castille-e-Leon ដែលផ្ទៃដីប្រហែល ៤០.០០០ហិកតា ត្រូវបានបំផ្លិចបំផ្លាញដោយអគ្គិភ័យ។ អ្នកស្ម័គ្រចិត្ត ២នាក់ បានបាត់បង់ជីវិត ពេលកំពុងទប់ទល់នឹងអណ្ដាតភ្លើង នៅទីនោះ ក្នុងសប្តាហ៍នេះ។

ឆ្មាំស៊ីវិលបាននិយាយថា បុរសម្នាក់ត្រូវបានចាប់ឃុំខ្លួន នៅថ្ងៃព្រហស្បតិ៍នេះ ពាក់ព័ន្ធនឹងចំហេះដែលផ្ទៃដី ៣.០០០ហិកតា ត្រូវបានឆាបឆេះ នៅជុំវិញទីក្រុង Puercas de Aliste ក្នុងតំបន់ Castille-e-Leone។

ចំណែកជនសង្ស័យម្នាក់ទៀត ត្រូវបានចាប់ខ្លួន កាលពីថ្ងៃពុធ ពាក់ព័ន្ធនឹងចំហេះព្រៃចំនួន ៥កន្លែង នៅចន្លោះថ្ងៃទី១៩ ខែកក្កដា ដល់ថ្ងៃទី៣ ខែសីហា នៅជុំវិញរមណីយដ្ឋានភាគខាងត្បូងនៃទីក្រុង Malaga។

រដ្ឋមន្ត្រីក្រសួងមហាផ្ទៃអេស្ប៉ាញ លោក Fernando Grande-Marlaska បានប្រាប់វិទ្យុ RAC1 កាលពីថ្ងៃពុធថា មនុស្ស ២៥នាក់ផ្សេងទៀត ត្រូវបានឃុំខ្លួន ដោយសារការបង្កឲ្យមានអគ្គិភ័យ នៅរដូវក្តៅនេះ ហើយថា មនុស្សជាច្រើននាក់ទៀតមានចេតនាបណ្ដាលឲ្យមានភ្លើងឆេះព្រៃ៕