ទាំងប្រទេសរុស្សី និងអ៊ុយក្រែន បានប្រាប់ឲ្យដឹងថា ភាគីទាំង២ បានដោះដូរអ្នកទោសចំនួន ៨៤នាក់ទៅវិញទៅមកស្មើគ្នា នៅថ្ងៃព្រហស្បតិ៍ (ទី១៤ ខែសីហា) នេះ ជាការដោះដូរចុងក្រោយបង្អស់ដែលបានឃើញថា POW (អ្នកទោសសង្គ្រាម ឬឈ្លើយសឹក) រាប់រយនាក់ ត្រូវបានដោះលែង រហូតមកដល់ពេលនេះ ក្នុងឆ្នាំនេះ។

ការដោះដូរចុងក្រោយនេះ បានកើតឡើងនៅមុនថ្ងៃនៃជំនួបកំពូល រវាងប្រធានាធិបតីរុស្ស៊ី លោក Vladimir Putin និងសមភាគីអាមេរិក លោក Donald Trump នៅរដ្ឋអាឡាស្កា នាថ្ងៃសុក្រ។

ក្រសួងការពារជាតិរុស្ស៊ី បានឲ្យដឹងនៅលើកម្មវិធីផ្ញើសារ Telegram ថា ប្រទេសអេមីរ៉ាត់អារ៉ាប់រួម បានជួយសម្រុះសម្រួលដល់ការដោះដូរនេះ ហើយថា បុគ្គលិករុស្ស៊ីដែលត្រូវបានដោះលែង កំពុងទទួលបាន «ជំនួយផ្នែកផ្លូវចិត្ត និងវេជ្ជសាស្ត្រ»។

ចំណែកប្រធានាធិបតីអ៊ុយក្រែន លោក Volodymyr Zelenskyy បានលើកឡើងនៅលើបណ្ដាញសង្គមថា ក្នុងចំណោមអ្នកទោសដែលត្រូវបានដោះដូរ គឺមាន «ទាំងបុគ្គលិកយោធា និងជនស៊ីវិល» ដែលមួយចំនួនត្រូវបាន «ឃុំឃាំងដោយរុស្ស៊ី តាំងពីឆ្នាំ២០១៤ ២០១៦ និង ២០១៧»។

ការដោះដូរអ្នកទោសទ្រង់ទ្រាយធំនេះ គឺជាលទ្ធផលជាក់ស្តែងតែមួយគត់ ដែលកើតចេញពីកិច្ចចរចាសន្តិភាព ៣ជុំ រវាងគណៈប្រតិភូរុស្ស៊ី និងអ៊ុយក្រែន នៅទីក្រុងអ៊ីស្តង់ប៊ុល ប្រទេសទួរគី ចន្លោះខែឧសភា ដល់ខែកក្កដា។ នៅក្នុងជុំចុងក្រោយនៃកិច្ចចរចារបស់ភាគីទាំង២ កាលពីខែមុន រុស្ស៊ី និងអ៊ុយក្រែន បានយល់ព្រមដោះដូរអ្នកទោសសង្គ្រាមចំនួន ១២.០០០នាក់ស្មើគ្នា៕