រដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៊ីស្រាអែល លោក Bezalel Smotrich បានប្រកាសថា កិច្ចការងារនឹងចាប់ផ្តើមនៅលើផែនការតាំងទីលំនៅដែលពន្យារពេលយូរមកហើយ ដោយនឹងខណ្ឌចែកតំបន់កាន់កាប់ West Bank និងកាត់ទឹកដីនេះចេញពីក្រុងហ្សេរុយសាឡិមខាងកើត នៅក្នុងជំហានមួយដែលការិយាល័យរបស់លោកនិយាយថា នឹងអាច "កប់" បំបាត់គំនិតនៃការបង្កើតរដ្ឋប៉ាឡេស្ទីន។

រដ្ឋាភិបាលប៉ាឡេស្ទីន សម្ព័ន្ធមិត្ត និងក្រុមយុទ្ធនាការបានថ្កោលទោសគម្រោងនេះ ដោយហៅថាជារឿងខុសច្បាប់ ហើយនិយាយថា ការខណ្ឌបំបែកទឹកដីបែបនេះ នឹងបំផ្លាញផែនការសន្តិភាពក្នុងតំបន់។

ដោយឈរនៅទីតាំងលំនៅដែលបានគ្រោងទុកនៅក្រុង Maale Adumim កាលពីថ្ងៃព្រហស្បតិ៍ (១៤ សីហា) លោក Smotrich ដែលក៏ជាអ្នកតាំងលំនៅមួយរូបផងដែរនោះ បាននិយាយថា «លោកនាយករដ្ឋមន្ត្រីអ៊ីស្រាអែល Benjamin Netanyahu និងលោកប្រធានាធិបតីអាមេរិក Donald Trump បានយល់ព្រមចំពោះការចាប់ផ្ដើមឡើងវិញនៃការអភិវឌ្ឍឈ្មោះថា E1 នេះហើយ»។ ពុំមានការបញ្ជាក់ភ្លាមៗពីមេដឹកនាំទាំងពីរនៅឡើយទេ។

លោក Smotrich បន្តថា "ពិភពលោកដែលកំពុងព្យាយាមទទួលស្គាល់រដ្ឋប៉ាឡេស្ទីន នឹងបានចម្លើយផ្ទាល់ជាក់ស្ដែងនៅទឹកដីនេះ។ មិនមែនជាមួយនឹងឯកសារ ឬជាមួយនឹងការសម្រេចចិត្ត ឬសេចក្តីថ្លែងការណ៍អ្វីនោះទេ ប៉ុន្តែជាមួយនឹងការពិត... ការពិតនៃផ្ទះសម្បែង ការពិតនៃអ្នកជិតខាងនៅទីនេះ"។

នៅពេលត្រូវសាកសួរទាក់ទងនឹងការលើកឡើងនេះ អ្នកនាំពាក្យក្រសួងការបរទេសអាមេរិក បាននិយាយបញ្ឆិតបញ្ឆៀងថា៖ «តំបន់ West Bank ដែលមានស្ថិរភាព អាចរក្សាអ៊ីស្រាអែលឱ្យមានសុវត្ថិភាព និងស្របតាមគោលដៅរបស់រដ្ឋបាលនេះដើម្បីសម្រេចបានសន្តិភាពក្នុងតំបន់» ហើយបានរុញឱ្យអ្នកកាសែតទៅសួរបញ្ជាក់ពីរដ្ឋាភិបាលអ៊ីស្រាអែល សម្រាប់ព័ត៌មានលម្អិតបន្ថែមលើបញ្ហានេះ៕