ប្រធានផ្នែកធនធានមនុស្សថ្មីរបស់រដ្ឋបាលសហរដ្ឋអាមេរិក បាននិយាយកាលពីថ្ងៃព្រហស្បតិ៍ (១៤ សីហា) ថា រដ្ឋបាលរបស់លោកប្រធានាធិបតី Donald Trump ទំនងជានឹងកាត់បន្ថយការងាររបស់បុគ្គលិកប្រហែល ៣០០.០០០នាក់ នៅឆ្នាំនេះ ដែលនឹងជាចំនួនធ្លាក់ចុះ ១២,៥% នៃកម្លាំងពលកម្មសហព័ន្ធ ចាប់តាំងពីខែមករាមក។

ប្រមុខការិយាល័យគ្រប់គ្រងបុគ្គលិក លោក Scott Kupor បាននិយាយថា តួលេខ ៨០% នៃបុគ្គលិកត្រូវកាត់រំសាយទាំងនោះ នឹងចាកចេញដោយស្ម័គ្រចិត្ត ហើយមានតែ ២០% ប៉ុណ្ណោះដែលត្រូវបណ្តេញចេញពីការងារ។ នោះស្មើនឹងជិតទ្វេដងនៃបុគ្គលិកចំនួន ១៥៤.០០០នាក់ ដែលសារព័ត៌មានរ៉យទ័រធ្លាប់រាយការណ៍ថា យល់ព្រមទទួលយកសំណើលាឈប់ការងារដោយស្ម័គ្រចិត្ត កាលពីខែមុន។

ប្រសិនបើការប៉ាន់ប្រមាណរបស់លោក Kupor ជាតួលេខត្រឹមត្រូវ នោះចំនួននិយោជិតដែលចាកចេញពីកម្លាំងការងារសហព័ន្ធ នឹងមានច្រើនជាងទ្វេដងនៃចំនួន ៥,៩% ដែលត្រូវលុបបំបាត់ក្នុងកម្លាំងពលកម្មស៊ីវិលរបស់រដ្ឋាភិបាលសហរដ្ឋអាមេរិក ក្នុងឆ្នាំសារពើពន្ធ ២០២៣។

នៅពេលចូលកាន់តំណែងក្នុងខែមករា លោកប្រធានាធិបតី Trump បានចាប់ផ្តើមយុទ្ធនាការដ៏ធំមួយដើម្បីកាត់បន្ថយកម្លាំងពលកម្មស៊ីវិលសហព័ន្ធដ៏រឹងមាំចំនួន ២,៤លាននាក់ ដែលលោកនិយាយថា ច្រើនខ្លាំងពេក និងគ្មានប្រសិទ្ធភាព៕