រុស្ស៊ី និងអ៊ុយក្រែន បានដោះដូឈ្លើយសឹកសង្រ្គាមចំនួន ៨៤នាក់ រៀងៗខ្លួននៅថ្ងៃព្រហស្បតិ៍ (១៤ សីហា) នៅមុនពេលលោកប្រធានាធិបតីរុស្ស៊ី Vladimir Putin និងសមភាគីអាមេរិក លោក Donald Trump បើកជំនួបកំពូលនៅរដ្ឋអាឡាស្កា នាថ្ងៃសុក្រនេះ។

ទីក្រុងគីវនិយាយថា ជនជាតិអ៊ុយក្រែនដែលត្រូវដោះលែងនោះ រួមមានអ្នកជាប់ឃុំរយៈពេលយូរ និង "អ្នកការពារ Mariupol" ដែលជាទីក្រុងកំពង់ផែអ៊ុយក្រែន ដែលធ្លាក់ទៅក្នុងដៃកងកម្លាំងរុស្ស៊ី កាលឆ្នាំ២០២២ បន្ទាប់ពីការឡោមព័ទ្ធជិត ៣ខែ។

ភាគីទាំងពីរបានបញ្ជាក់ពីការផ្លាស់ប្តូរអ្នកទោសចំនួន ៨៤នាក់នេះ ដែលជាការដោះដូរចុងក្រោយបង្អស់ ក្នុងយុទ្ធនាការដោះលែងឈ្លើយសឹកទៅវិញទៅមករាប់ពាន់នាក់ រហូតមកដល់ពេលនេះនៅក្នុងឆ្នាំនេះ។

ក្រសួងការពារជាតិរុស្ស៊ី និយាយថា អេមីរ៉ាតអារ៉ាប់រួមបានសម្រុះសម្រួលការផ្លាស់ប្តូរនេះ ហើយថា បុគ្គលិករុស្ស៊ីដែលត្រូវដោះលែង កំពុងទទួលបាន "ជំនួយផ្លូវចិត្ត និងវេជ្ជសាស្ត្រ"។ ចំណែកប្រធានាធិបតីអ៊ុយក្រែន លោក Volodymyr Zelensky បាននិយាយថា ក្នុងចំណោមឈ្លើយសឹកដែលត្រូវដោះដូរនោះគឺមាន "ទាំងបុគ្គលិកយោធា និងជនស៊ីវិល" ដែលខ្លះត្រូវបាន "ឃុំឃាំងដោយរុស្ស៊ី តាំងតែពីឆ្នាំ២០១៤, ២០១៦, និង២០១៧ មក"។

ការដោះដូរអ្នកទោសទ្រង់ទ្រាយធំបន្តបន្ទាប់បែបនេះគឺជាលទ្ធផលជាក់ស្តែងតែមួយគត់ពីកិច្ចចរចាសន្តិភាពចំនួន ៣ជុំនាពេលកន្លងមករវាងគណៈប្រតិភូរុស្ស៊ី និងអ៊ុយក្រែន នៅទីក្រុងអ៊ីស្តង់ប៊ុល ចន្លោះខែឧសភា ដល់ខែកក្កដា៕