​បាល់ទាត់៖ ​ខ្សែប្រយុទ្ធ​ប៉ូឡូញ​របស់​ក្លិប​ Bayern Munich កីឡាករ Robert Lewandowski បាន​ក្លាយជា​ម្ចាស់​ពានជ័យលាភី​កីឡាករ​ឆ្នើម​បំផុត​ប្រចាំឆ្នាំ២០២១ FIFA Best Player of the Year ស្របពេល Cristian Ronaldo ឈ្នះ​ពានពិសេស​ដាច់ដោយឡែក​មួ​យ​ពី FIFA​។ ​​កីឡាករ​វ័យ ៣៣ឆ្នាំ Robert Lewandowski ឈ្នះ​ពាន​ជ័យលាភី​នេះ ២ឆ្នាំ​ជាប់​គ្នា​ក្រោយ​ស៊ុត​បញ្ចូល​ទី​ក្នុង​ឆ្នាំ២០២១ ដល់​ទៅ ៦៩គ្រាប់ និង​ទទួលបាន​ការគាំទ្រ​នៅ​ពីលើ Mohamed Salah និង Lionel Messi​។​

​​Robert Lewandowski ថែមទាំង​បាន​បំបែក​កំណត់ត្រា ៤៩ឆ្នាំ​របស់​ខ្សែប្រយុទ្ធ​អាល្លឺម៉ង់ Gerd Muller ជា​កីឡាករ​ដែល​ស៊ុត​បញ្ចូល​ទី​ច្រើន​បំផុត​នៅ Bundesliga ក្នុង​មួយឆ្នាំ​ប្រតិទិន​សរុប ៤៣គ្រាប់​ក្នុង ៣៤ប្រកួត​ក្នុង​លី​គ​។ ​​ចំណែកឯ​ខ្សែប្រយុទ្ធ​ក្រុម​ Manchester United, Cristiano Ronaldo បានឈ្នះ​ពាន​ពិសេស​មួយពី FIFA គឺ FIFA Best Player Special Award ក្រោយ​បំបែក​កំណត់ត្រា​កីឡាករ​ដែល​ស៊ុត​បញ្ចូល​ទី​ច្រើន​បំផុត​ ឱ្យ​ក្រុមជំរើសជាតិ​សរុប ១១៥គ្រាប់​ឱ្យ​ព័រទុយហ្កាល់​បំបែក​កំណត់ត្រា​របស់​ខ្សែប្រយុទ្ធ​អ៊ីរ៉ង់ Ali Daei ដែលមាន​សរុប ១០៩គ្រាប់​។ ​បន្តម​កពាន​ជ័យលាភី​ផ្សេងទៀត​រួមមាន Erik Lamela ឈ្នះ​ពាន​គ្រាប់​បាល់​បញ្ចូល​ទី​អស្ចារ្យ​បំផុត FIFA Pukas Award ដោយ​គ្រាប់​បាល់​ស៊ុត​បញ្ចូល​ទី​ឱ្យ Spurs លើ Arsenal កាលពី​ខែ​មិនា​ឆ្នាំមុន​។

​​អ្នកចាំទី Chelsea, Edourad Mendy ឈ្នះ​ពាន​អ្នកចាំទី​ឆ្នើម​បំផុត​របស់ FIFA ស្របពេល​អ្នកចាត់ការ Chelsea, Thomas Tuchel ឈ្នះ​ពាន​អ្នកចាត់ការ​ឆ្នើម​បំផុត​របស់ FIFA ផងដែរ​។ ​​ចំណែក​ផ្នែក​នារី​ខ្សែប្រយុទ្ធ​ក្រុម​នារី Barcelona កីឡាការិនី Alexia Putellas ឈ្នះ​ពាន​កីឡាការិនី​ឆ្នើម​បំផុត​របស់ FIFA ផងដែរ​ស្របពេល​កីឡាការិនី​កាណាដា Christian Sinclair ក៏​មិន​ខុសពី Ronaldo ដែរ​ដោយ​ឈ្នះ​ពាន FIFA Best Women Special Award ក្នុងនាម​ជា​កីឡាការិនី​ដែល​ស៊ុត​បញ្ចូល​ទី​ច្រើន​បំផុត​ ឱ្យ​ក្រុម​ជំរើសជាតិ​ដល់​ទៅ ១៨៨គ្រាប់​៕

​អត្ថបទ​៖​នាង សុភា​វុ​ធ