អនុរដ្ឋមន្ត្រីការបរទេសប៉េរូ លោក Felix Denegri Boza បានថ្កោលទោសសុន្ទរកាថារបស់ប្រធានាធិបតីកូឡុំប៊ី លោក Gustavo Petro ដែលបានពណ៌នាការស៊ើបអង្កេតបឋមលើអ្នកស្ទង់ស្ថានការណ៍ជនជាតិកូឡុំប៊ីពីរនាក់នៅក្នុងដែនដី Santa Rosa de Loreto ថា «ខុសច្បាប់» ក្នុងពេលមានភាពតានតឹងលើអធិបតេយ្យភាពដែនដី។

លោក Denegri Boza និយាយក្នុងសន្និសីទសារព័ត៌មាន បានច្រានចោលសេចក្តីថ្លែងការណ៍របស់ លោក Petro ដែលលោកបាននិយាយថា ធ្វើឱ្យប៉ះពាល់ដល់ដែនអធិបតេយ្យភាពរបស់ប្រទេសប៉េរូ។

លោកបាននិយាយថា «លោកបានចេញផ្សាយនៅលើបណ្តាញ Tweeter ដោយនិយាយអំពីការឃុំខ្លួនអ្នកស្ទង់ស្ថានការណ៍ជនជាតិកូឡុំប៊ីនៅក្នុងស្រុក Santa Rosa de Loreto។ យើងបដិសេធយ៉ាងដាច់អហង្ការ និងយ៉ាងម៉ឺងម៉ាត់នូវសេចក្តីថ្លែងការណ៍ទាំងនេះដែលចោទសួរអំពីដែនអធិបតេយ្យភាពរបស់ប្រទេសប៉េរូលើតំបន់នេះ»។

ជនជាតិកូឡុំប៊ីពីរនាក់ដែលត្រូវបានឃុំខ្លួន នៅក្នុងដែនដី Santa Rosa កំពុងស្ថិតនៅក្រោមការស៊ើបអង្កេតបឋមដោយក្រសួងសាធារណៈរបស់ប្រទេសប៉េរូ សម្រាប់សកម្មភាពតាមដែលចោទប្រកាន់ប្រឆាំងនឹងអធិបតេយ្យភាពជាតិ នេះបើយោងតាមសេចក្តីថ្លែងការណ៍របស់ក្រសួងការបរទេសប៉េរូដែលបានបង្ហោះនៅលើបណ្តាញ X ។ ជម្លោះកាន់តែខ្លាំងឡើងបន្ទាប់ពី លោក Petro បានយកវេទិកាបណ្តាញផ្សព្វផ្សាយសង្គម X ដើម្បីពណ៌នាពីការឃុំខ្លួននេះថា «ខុសច្បាប់» និងជា «ការចាប់ជំរិត»។