អ្នកនាំពាក្យអង្គការសហប្រជាជាតិ លោក Stephane Dujarric បាននិយាយកាលពីថ្ងៃព្រហស្បតិ៍ ទី១៤ ខែសីហា ថា អង្គការសហប្រជាជាតិ អំពាវនាវឱ្យអ៊ីស្រាអែល ដកការសម្រេចចិត្តរបស់ខ្លួនក្នុងការចាប់ផ្តើមការងារលើការតាំងលំនៅដែលបានពន្យារពេលជាយូរមក ដែលនឹងបែងចែកតំបន់ West Bank និងកាត់ផ្តាច់ចេញពីទីក្រុងហ្ស៊េរុយសាឡឹមខាងកើត។ លោក Dujarric បានប្រាប់អ្នកសារព័ត៌មានថា «វានឹងបញ្ចប់ការរំពឹងទុកនៃដំណោះស្រាយរដ្ឋពីរ»។ «ការតាំងលំនៅ គឺផ្ទុយនឹងច្បាប់អន្តរជាតិ។ ការតាំងលំនៅ នឹងបញ្ជាក់ឱ្យឃើញច្បាស់ពីការរំលោភចូលកាន់កាប់បន្ថែមទៀត»។

កាលពីថ្ងៃព្រហស្បតិ៍ រដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៊ីស្រាអែល លោក Bezalel Smotrich បានប្រកាសថាការងារនឹងចាប់ផ្តើមលើការតាំងលំនៅរបស់ជនជាតិជ្វីហ្វតាមដែលគ្រោងទុកនៅចំណុចសំខាន់មួយនៅតំបន់កាន់កាប់ West Bank ហើយលោកបាននិយាយថាចំណាត់ការនេះមានគោលដៅច្បាស់លាស់។

ផែនការនេះនឹងសាងសង់លំនៅឋានចំនួន៣.៤០០ខ្នង នៅក្នុងដែនដីដែលអ៊ីស្រាអែលដែលហៅថា E1 លាតសន្ធឹងភាគខាងកើតទីក្រុងហ្ស៊េរុយសាឡឹម ហើយនឹងភ្ជាប់ទីក្រុងនេះជាមួយនឹងការតាំងលំនៅរបស់ជនជាតិជ្វីហ្វ នៅតំបន់ Maale Adumim ។

ក្រុមអ្នករិះគន់និយាយថា ការចំណាត់ការនេះនឹងបែងចែកតំបន់ West Bank បន្ថែមទៀត ជាតំបន់ដែលមនុស្សជាច្រើនចង់រក្សាទឹកដីឲ្យនៅជាប់គ្នា និងបង្កើតជាមូលដ្ឋាននៃរដ្ឋប៉ាឡេស្ទីននាពេលអនាគត។