ការិយាល័យសម្របសម្រួលជំនួយរបស់អង្គការសហប្រជាជាតិ OCHA បាននិយាយក្នុងបច្ចុប្បន្នភាពចុងក្រោយរបស់ខ្លួននាថ្ងៃព្រហស្បតិ៍ (១៤ សីហា) ថា ទុក្ខវេទនា ភាពអត់ឃ្លាន និងកង្វះអាហារូបត្ថម្ភកាន់តែស៊ីជម្រៅខ្លាំងឡើងនៅក្នុងតំបន់ហ្កាហ្សា ហើយបេសកកម្មមនុស្សធម៌នៅតែប្រឈមការពន្យារពេល និងឧបសគ្គ ខណៈសីតុណ្ហភាពក្តៅគគុកបន្ថែមការរងទុក្ខវេទនាជុំទិសរបស់ប្រជាជនប៉ាឡេស្ទីន។

បន្ថែមពីលើការទម្លាក់គ្រប់បែក និងការរត់ភៀសខ្លួនឥតឈប់ឈរ ការិយាល័យ OCHA និយាយថា ថ្មីៗនេះ អ៊ីស្រាអែល បដិសេធសកម្មភាពមនុស្សធម៌តិចជាងមុន ប៉ុន្តែបេសកកម្មដែលត្រូវអនុម័ត "នៅតែចំណាយពេលច្រើនដើម្បីសម្រេចបាន ហើយក្រុមបុគ្គលិកត្រូវបង្ខំចិត្តរង់ចាំតាមផ្លូវ ដ៏គ្រោះថ្នាក់ កកស្ទះ ឬមិនអាចឆ្លងកាត់បាន"។

កម្មវិធីស្បៀងអាហារពិភពលោក (WFP) បានឱ្យដឹងថា ភាពអត់ឃ្លានក្នុងតំបន់ហ៊ុំព័ទ្ធប៉ាឡេស្ទីននេះ បច្ចុប្បន្នស្ថិតក្នុងកម្រិតខ្ពស់បំផុត ចាប់តាំងពីជម្លោះចាប់ផ្តើមឆ្នាំ២០២៣មក។ ទោះជា WFP និងដៃគូនានាមានស្បៀងដើម្បីចិញ្ចឹមប្រជាជនហ្កាហ្សាទាំងអស់ ២,១លាននាក់ សម្រាប់ពេលយ៉ាងហោចណាស់ ៣ខែក៏ដោយ ក៏ WFP និយាយថា "ហានិភ័យនៃការខូចគុណភាព និងការដុះផ្សិតនៃគ្រឿងផ្គត់ផ្គង់ដែលជាប់គាំង បានកើនឡើងខ្លាំង ហើយស្បៀងមួយចំនួនជិតផុតកាលបរិច្ឆេទកំណត់ទៅហើយ"។

ទន្ទឹមនឹងនេះ សារព៏ត៌មានរបស់អង្គការសហប្រជាជាតិ UN News រាយការណ៍ថា រលកកម្ដៅកំពុងធ្វើឱ្យស្ថានការណ៍កាន់តែអាក្រក់ទៅៗ ដោយសារតំបន់ហ្កាហ្សាបច្ចុប្បន្ន កំពុងជួបប្រទះសីតុណ្ហភាពលើសពី ៤០អង្សាសេ យ៉ាងក្ដៅគគុក។ ទីភ្នាក់ងារជនភៀសខ្លួនប៉ាឡេស្ទីន UNRWA បានព្រមានថា ការខ្សោះជាតិទឹកកំពុងកើនឡើង ដោយសារតែលទ្ធភាពទទួលបានទឹកនៅមានកម្រិតខ្លាំងណាស់៕