កងកម្លាំងអ៊ុយក្រែន បានវាយប្រហារលើកំពង់ផែសមុទ្រ Olya ក្នុងតំបន់ Astrakhan របស់រុស្ស៊ី ដោយបានវាយត្រូវនាវាមួយគ្រឿងដែលផ្ទុកដោយបំណែកនៃធាតុផ្សំយានដ្រូន Shahed និងគ្រាប់រំសេវពីប្រទេសអ៊ីរ៉ង់ នេះបើយោងតាមរបាយការណ៍របស់យោធាអ៊ុយក្រែន។

យោងតាមសេចក្តីថ្លែងការណ៍នេះបានឱ្យដឹងថា កងកម្លាំងប្រតិបត្តិការពិសេស (SSO) ក្នុងការសម្របសម្រួលជាមួយអង្គភាពផ្សេងទៀតនៃកងកម្លាំងការពារអ៊ុយក្រែន នៅថ្ងៃព្រហស្បតិ៍ ទី១៤ ខែសីហា បានកំណត់គោលដៅលើកំពង់ផែនោះដើម្បីកាត់បន្ថយសមត្ថភាពរបស់រុស្ស៊ី ក្នុងការបើកការវាយប្រហារតាមអាកាសលើគៅលដៅនៃទីក្រុងនានារបស់អ៊ុយក្រែន។

កំពង់ផែ Olya នេះបម្រើជាមជ្ឈមណ្ឌលភស្តុភារដ៏សំខាន់មួយរបស់រុស្ស៊ី សម្រាប់ការនាំចូលគ្រឿងយុទ្ធោបករណ៍ពីប្រទេសអ៊ីរ៉ង់។

នាវាដែលត្រូវបានវាយប្រហារនោះគឺស្ថិតកំពង់ផែ Olya លេខ៤ ដែលត្រូវបានរាយការណ៍ថា មានផ្ទុកគ្រឿងបន្លាស់ផ្គុំយានដ្រូន និងគ្រាប់បែក ខណៈការវាយតម្លៃការខូចខាតកំពុងបន្ត។

អ្នកស្រុករាយការណ៍ថាបានឮការផ្ទុះរហូតដល់ ១០លើក ចាប់ពីម៉ោងក្នុងស្រុក ៤ទៀបភ្លឺ ហើយបណ្តាញតេលេក្រាមជាច្រើនបានចែករំលែកវីដេអូ និងរូបថត ដែលបង្ហាញឱ្យឃើញពីអគ្គីភ័យនៅជិតទីតាំងនោះ ប៉ុន្តែមន្ត្រីរុស្ស៊ី មិនទាន់បញ្ជាក់ពីការខូចខាតអ្វីនៅឡើយទេ៕