សារព័ត៌មាន The Time of Israel បានរាយការណ៍កាលពីថ្ងៃព្រហស្បតិ៍ (១៤ សីហា) ថា តាមរយៈរលកនៃវិបត្តិដែលកើតឡើងនៅតំបន់ហ្កាហ្សាស្រ្ទីប ចាប់តាំងពីខែតុលា ឆ្នាំ២០២៣មក កិច្ចខិតខំប្រឹងប្រែងមនុស្សធម៌មួយនៅតែមានស្ថិរភាពពេញមួយសង្រ្គាមជិត ២ឆ្នាំមកនេះ នោះគឺការជម្លៀសអ្នកជំងឺ និងអ្នករបួស ចេញពីដែនដីនេះសម្រាប់ការថែទាំវេជ្ជសាស្រ្ត។

សេចក្ដីរាយការណ៍និយាយថា តាមរយៈបទឈប់បាញ់ និងរយៈពេលនៃការប្រយុទ្ធគ្នាដ៏ខ្លាំងក្លា អ៊ីស្រាអែលបានសម្រួលដល់ការចាកចេញរបស់ពលរដ្ឋហ្កាហ្សា ដែលមានជំងឺ និងរបួសរាប់ពាន់នាក់រួចមកហើយទៅកាន់បណ្ដាប្រទេសអារ៉ាប់ អឺរ៉ុប និងកន្លែងផ្សេងទៀត រួមជាមួយនឹងសមាជិកគ្រួសារដែលអមដំណើរពួកគេ។

សម្រាប់រយៈពេល ៩ខែដំបូងចាប់តាំងពីខែមិថុនា ឆ្នាំ២០២៤ ពលរដ្ឋហ្កាហ្សាប្រហែល ១.៥០០នាក់ ត្រូវបានអនុញ្ញាតឱ្យចេញពីដែនដីនេះ ពោលគឺប្រហែល ១៥០នាក់ក្នុងមួយខែ នេះបើយោងតាមស្ថាប័នក្រសួងការពារជាតិរបស់អ៊ីស្រាអែល ដែលសម្របសម្រួលជាមួយប្រតិបត្តិការមនុស្សធម៌ហ្កាហ្សា COGAT។

COGAT បានឱ្យដឹងថា ចំនួននោះបានកើនឡើងគួរឱ្យកត់សម្គាល់តាំងពីពេលនោះមក ដោយមានប្រហែល ២.៥០០នាក់ ចាកចេញពីហ្កាហ្សា ចាប់ពីពាក់កណ្តាលខែមីនា ដល់ខែកក្កដា ឆ្នាំនេះ ដែលតំណាងឱ្យចន្លោះពី ៥០០ ទៅ ៦០០នាក់ ក្នុងមួយខែ។ សមត្ថភាពរបស់អ្នកជំងឺ អ្នករបួស និងសាច់ញាតិដែលអមដំណើរ ក្នុងការចាកចេញពីហ្កាហ្សាកំឡុងសង្គ្រាម មានភាពស្មុគ្រស្មាញណាស់ និងប្រែប្រួល អាស្រ័យលើការប្រយុទ្ធជាក់ស្ដែង ខណៈនៅមានមនុស្សរាប់ពាន់នាក់មិនទាន់ទទួលបានការអនុញ្ញាតឱ្យចាកចេញនៅឡើយ៕