ពលរដ្ឋនូវែលសេឡង់ ដែលចាកចេញពីប្រទេសនេះ បានឡើងដល់កម្រិតខ្ពស់បំផុតក្នុងរយៈពេល ១៣ឆ្នាំ ដោយមានជាងមួយភាគបីនៃអ្នកធ្វើចំណាកស្រុកទាំងនោះមានអាយុក្រោម ៣០ឆ្នាំ ដោយសារភាពអត់ការងារធ្វើកើនឡើង ហើយកំណើនសេដ្ឋកិច្ចនៅតែទន់ខ្សោយ។

ទិន្នន័យដែលចេញផ្សាយដោយស្ថិតិនូវែលសេឡង់ នៅថ្ងៃសុក្រ (១៦ សីហា) នេះ បានបង្ហាញថា ពលរដ្ឋនូវែលសេឡង់ចំនួន ៧១.៨០០នាក់ បានចាកចេញពីប្រទេសនូវែលសេឡង់ ក្នុងអំឡុងឆ្នាំដែលបានបញ្ចប់ត្រឹមខែមិថុនា ឆ្នាំ២០២៥ ដោយកើនឡើងពីតួលេខ ៦៧.៥០០នាក់ ក្នុងពេល ១២ខែមុន និងទាបជាងបន្តិចពីកំណត់ត្រា ៧២.៤០០នាក់ ក្នុងឆ្នាំដែលបានបញ្ចប់នៅខែកុម្ភៈ ឆ្នាំ២០១២។

ការធ្វើអន្តោប្រវេសន៍សុទ្ធរបស់នូវែលសេឡង់ -- ពោលគឺចំនួនអ្នកចូលមកដល់ក្នុងប្រទេសដកនឹងចំនួនអ្នកដែលចាកចេញ -- ក៏បានធ្លាក់ចុះផងដែរ ជាមួយនឹងជនបរទេសដែលផ្លាស់ទៅនៅក្នុងប្រទេសនេះមានចំនួន ៥,៣លាននាក់ ជិតពាក់កណ្តាលពីឆ្នាំ២០២៤។

ការប្រញាប់ប្រញាល់ចាកចេញបែបនេះរបស់ពលរដ្ឋ កើតឡើងស្របពេលមានការធ្លាក់ចុះសេដ្ឋកិច្ចដ៏អាក្រក់បំផុតចាប់តាំងពីឆ្នាំ១៩៩១មក ដែលអ្នកវិភាគបានស្តីបន្ទោសលើផលិតភាពទាប និងកំហុសគោលនយោបាយផ្សេងៗ។ ទិន្នន័យបានបង្ហាញកាលពីសប្តាហ៍មុនថា ភាពអត់ការងារធ្វើបានកើនឡើងដល់កម្រិតខ្ពស់ជិត ៥ឆ្នាំក្នុងអត្រា ៥,២% នៅក្នុងត្រីមាសទីពីរនៃឆ្នាំនេះ៕