មន្ត្រីទីភ្នាក់ងារជនភៀសខ្លួនរបស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ប្រជាជនស៊ីរីជាង ២,៣ លាននាក់ បានវិលត្រឡប់មកប្រទេសកំណើតវិញ ចាប់តាំងពីថ្ងៃទី ០៨ ខែធ្នូ ឆ្នាំ ២០២៤ និងបានបញ្ជាក់ថា អ្នកវិលត្រឡប់មកវិញទាំងនោះ ប្រឈមនឹងការខ្វះខាតយ៉ាងខ្លាំងនូវលំនៅឋាន និងជីវភាពរស់នៅលំបាក ដោយពួកគេភាគច្រើនបានឃើញផ្ទះជាច្រើនខ្នង ត្រូវបានបំផ្លាញ ឬរងខូចខាត។

លោកស្រី Celine Schmitt អ្នកនាំពាក្យការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនស៊ីរី បានប្រាប់ទីភ្នាក់ងារសារព័ត៌មាស៊ីនហួថា អ្នកវិលត្រឡប់មកវិញទាំងអស់ រាប់បញ្ចូលទាំងជនភៀសខ្លួនជាង ៧៥០.000នាក់ ដែលមកពីប្រទេសទួរគី លីបង់ ហ្ស៊កដានី អេហ្ស៊ីប និងអ៊ីរ៉ាក់ និងប្រជាជនស៊ីរីផ្លាស់ទីលំនៅក្នុងស្រុកជាង ១,៦ លាននាក់។  

លោកស្រី Schmitt បានកត់សម្គាល់ឃើញថា អ្នកធ្វើមាតុភូមិនិវត្តន៍ទាំងនោះ បានលើកឡើងពីការធ្វើឲ្យសុវត្ថិភាពល្អប្រសើរឡើង និងបំណងប្រាថ្នាចង់ជួបជុំគ្រួសារឡើងវិញ ដែលជាការលើកទឹកចិត្តចម្បង ដោយបានបន្ថែមថា៖«បញ្ហាប្រឈមដ៏ធំមួយដែលបានលើកឡើងដោយអ្នកត្រឡប់មកវិញ គឺលទ្ធភាពទទួលបានលំនៅឋាន»។

លោកស្រី បាននិយាយថា៖«ពួកគេក៏ត្រូវការប្រាក់ចំណូល ការងារ សកម្មភាពចិញ្ចឹមជីវិត។ ពួកគេកំពុងប្រាប់យើងថា យើងមិនចង់បានជំនួយមនុស្សធម៌ទេ អ្វីដែលយើងចង់បាន គឺអាចធ្វើការ មានប្រាក់ចំណូល និងកសាងអនាគតរបស់យើង នៅក្នុងប្រទេសស៊ីរី»។

លោកស្រី បានលើកឡើងថា ការរៀបចំឯកសារផ្លូវច្បាប់ឡើងវិញ ក៏ជារឿងបន្ទាន់ផងដែរ ដោយសារកង្វះឯកសារអត្តសញ្ញាណ រារាំងកុមារពីការចុះឈ្មោះចូលរៀនជាផ្លូវការ នៅក្នុងសាលារៀន។

លោកស្រី Schmitt ក៏បានអំពាវនាវឲ្យមានការបន្ធូរបន្ថយទណ្ឌកម្ម ដើម្បីបើកការវិនិយោគ និងការផ្តល់មូលនិធិ ហើយបានជំរុញឲ្យមានទំនាក់ទំនងកាន់តែរឹងមាំ រវាងជំនួយមនុស្សធម៌ «បន្ទាន់» និង «ផែនការ  រយៈពេលវែង»។