ទូរទស្សន៍ Al Arabiya TV បានរាយការណ៍ដោយដកស្រង់ពីប្រភពនានាថា អ៊ីស្រាអែលបានច្រានចោលសំណើរបស់អ្នកសម្រុះសម្រួលសម្រាប់បទឈប់បាញ់មនុស្សធម៌រយៈពេល ៤៨ម៉ោង នៅក្នុងតំបន់ហ្កា ហ្សាស្ទ្រីប។

ទូរទស្សន៍នេះ បានដកស្រង់ប្រភព ដែលបាននិយាយថា៖«អ្នកសម្របសម្រួល បានដាក់សំណើទៅអ៊ីស្រាអែលសម្រាប់បទឈប់បាញ់រយៈពេល ៤៨ម៉ោង នៅក្នុងតំបន់ហ្កាហ្សាស្ទ្រីប ប៉ុន្តែសំណើនោះ ត្រូវបានច្រានចោល»។ ក្នុងពេលជាមួយគ្នានេះ បើយោងតាមប្រភព អ្នកសម្រុះសម្រួលកំពុងបន្តកិច្ចប្រឹងប្រែង របស់ពួកគេ ក្នុងការប្រើឥទ្ធិពលើអ៊ីស្រាអែល ដើម្បីសម្រេចបានបទឈប់បាញ់មនុស្សធម៌មួយ។

ផ្ទុយទៅវិញ សារព័ត៌មាន Asharq al-Awsat បានរាយការណ៍ ដោយដកស្រង់ប្រភពមួយពីក្រុមហាម៉ាសថា ព័ត៌មានអំពី «កិច្ចព្រមព្រៀងទូលំទូលាយ» ដែលកំពុងដំណើរការដោយអ្នកសម្របសម្រួល ត្រូវបានបំផ្លើស និងមិនត្រឹមត្រូវ។ កាសែតនេះ បានដកស្រង់ប្រភពដែលបាននិយាយថា៖«របាយការណ៍ថ្មីៗអំពីការចរចា និងការចាប់ផ្តើមឡើងវិញរបស់ពួកគេ ក៏ដូចជាអំពីអ្វីដែលគេហៅថា កិច្ចព្រមព្រៀងគ្រប់ជ្រុងជ្រោយ មានការបំផ្លើស និងភាពមិនត្រឹមត្រូវជាច្រើន»។ លោកបានបញ្ជាក់ពីការប្តេជ្ញាចិត្តរបស់ចលនានេះចំពោះផែនការរបស់អេហ្ស៊ីបសម្រាប់ការគ្រប់គ្រងតំបន់ហ្កាហ្សាស្ទ្រីប ហើយបាននិយាយថា «ក្រុមហាម៉ាសបានត្រៀមខ្លួនជាស្រេច ដើម្បីបង្កើតគណៈកម្មាធិការមួយ ក្នុងការសម្របសម្រួលជាមួយអេហ្ស៊ីប ដើម្បីត្រួតពិនិត្យការដកទ័ពអ៊ីស្រាអែល»។

កាលពីថ្ងៃអង្គារ គណៈប្រតិភូហាម៉ាសដឹកនាំដោយលោក Khalil al-Hayya ដែលជាមេដឹកនាំចលនានៅតំបន់ហ្កាហ្សាស្ទ្រីប បានទៅដល់ទីក្រុងគែរ តាមការអញ្ជើញរបស់រដ្ឋាភិបាលអេហ្ស៊ីប។ នៅថ្ងៃដដែល រដ្ឋមន្ត្រីការបរទេសអេហ្ស៊ីបលោក Badr Abdelatty បានប្រកាសថា ក្នុងការសម្របសម្រួលជាមួយទីក្រុងដូហា និងទីក្រុងវ៉ាស៊ីនតោន ទីក្រុងគែរកំពុងធ្វើការ ដើម្បីនាំភាគីជម្លោះត្រឡប់ទៅលើសំណើសុំបទឈប់បាញ់ រយៈពេល ៦០ថ្ងៃ នៅតំបន់ហ្កាហ្សាស្ទ្រីប។