អភិបាលតំបន់ លោក Alexander Khinshtein បាននិយាយនៅលើបណ្តាញសង្គម Telegram របស់លោកថា មនុស្សម្នាក់ បានស្លាប់ និង១០នាក់ ផ្សេងទៀត បានរងរបួស ក្នុងការវាយប្រហារដោយយាន    ដ្រូនរបស់អ៊ុយក្រែន ទៅលើអគារលំនៅឋានមួយកន្លែង ក្នុងតំបន់ Kursk នៃប្រទេសរុស្ស៊ី នៅព្រឹកថ្ងៃសុក្រនេះ។  

យោងតាមសេចក្តីរាយការណ៍បឋម ការវាយប្រហារដោយយានដ្រូន បានត្រូវចំអគារច្រើនជាន់មួយ នៅក្នុងសង្កាត់ផ្លូវដែកនៃទីក្រុងនេះ ដោយបង្កឲ្យមានអគ្គិភ័យ ដែលឆាបឆេះជាន់លើបំផុតចំនួន ៤ជាន់។

លោក Khinshtein បានសរសេរនៅលើបណ្តាញសង្គម Telegram ថា៖«នេះគឺជាទុក្ខដ៏ក្រៀមក្រំរបស់យើង ដែលស្ត្រីម្នាក់ បានស្លាប់ ដោយសារការវាយប្រហារនេះ។ ខ្ញុំសូមចូលរួមរំលែកទុក្ខយ៉ាងស្មោះស្ម័គ្រចំពោះគ្រួសាររបស់អ្នកស្រី»។

លោកបន្តថា អ្នកស្រុក ១០នាក់ផ្សេងទៀត បានរងរបួស ដោយម្នាក់ស្ថិតក្នុងស្ថានភាពធ្ងន់ធ្ងរ ហើយអ្នករងរបួសទាំងអស់ កំពុងទទួលការព្យាបាល។