រដ្ឋមន្ត្រីមហាផ្ទៃលោក Ivica Dacic បាននិយាយថា យ៉ាងហោចណាស់មន្ត្រីនគរបាលចំនួន ៤២នាក់ ក្នុងនោះ ២៦នាក់ នៅក្នុងទីក្រុងបែលក្រាដ (Belgrade) បានរងរបួស ក្នុងអំឡុងពេលកុបកម្មដ៏ធំ នៅកន្លែងប្រមូលផ្តុំគ្នា នៅទូទាំងប្រទេសស៊ែរប៊ី ហើយអ្នកតវ៉ា ៣៧នាក់ ត្រូវបានឃាត់ខ្លួន។

លោក Dacic បានថ្លែងនៅក្នុងសន្និសីទសារព័ត៌មានមួយថា៖«មន្រ្តីនគរបាលចំនួន ៤២នាក់ បានរងរបួស ក្នុងនោះ ២៦នាក់ នៅក្នុងទីក្រុងបែលក្រាដ។ ខ្ញុំសូមបញ្ជាក់ថា ទាំងនេះ គឺជាទិន្នន័យបឋម ហើយចំនួន ៤២នាក់ គឺតិចតួចបំផុត ខណៈដែលមនុស្សជាច្រើននាក់ផ្សេងទៀត បានរងរបួសយ៉ាងធ្ងន់ធ្ងរ។ វិធានការបន្ទាន់ កំពុងត្រូវបានអនុវត្ត។ នៅពេលនេះ មនុស្ស ៣៧នាក់ ត្រូវបានចាប់ខ្លួន»។  

លោក Dacic បាននិយាយថា៖«កាលពីយប់ថ្ងៃព្រហស្បតី៍ ដោយសារសកម្មភាពរបស់ក្រុមបាតុករ នៅកន្លែងជួបជុំគ្នា នៅទូទាំងប្រទេសស៊ែរប៊ី មានការរំលោភជាក់ស្តែងលើសណ្តាប់ធ្នាប់សាធារណៈ និងសន្តិភាព។ មន្ត្រីនគរបាល ត្រូវបានវាយប្រហារយ៉ាងឃោរឃៅ នៅថ្ងៃនោះ។ លើកលែងតែឧប្បត្តិហេតុដាច់ដោយឡែក ស្ថានការណ៍នៅទីក្រុងបែលក្រាដ មានភាពស្ងប់ស្ងាត់ និងស្ថិរភាពនៅពេលនេះ។ ចំពោះកន្លែងផ្សេងទៀត ការតវ៉ានៅតែបន្ត នៅក្នុងកន្លែងតាំងទីលំនៅ ៨-៩កន្លែងបន្ថែមទៀត ក៏ដូចជាការវាយប្រហារលើនគរបាល និងអគារស្នាក់ការរបស់គណបក្សវឌ្ឍនភាពស៊ែរប៊ី (SPP)) នៅទូទាំងប្រទេស។ ក្រៅពីទីក្រុងបែលក្រាដ ឧប្បត្តិហេតុធ្ងន់ធ្ងរបំផុតបានកើតឡើង នៅក្នុងទីក្រុង Novi Sad ជាកន្លែងដែលអគារជាច្រើនរបស់គណបក្ស SPP ត្រូវបានបំផ្លិចបំផ្លាញ នៅតាមកន្លែងមួយចំនួន»។