នាយករដ្ឋមន្ត្រីជប៉ុន លោក Shigeru Ishiba បានរំលឹកដល់ការបាត់បង់ជីវិតមនុស្សរាប់លាននាក់ នៅក្នុងសង្គ្រាមលោកលើកទី២ ហើយបានសម្តែងការសោកស្ដាយ ដោយការកត់សម្គាល់នេះកើតមានឡើងបន្ទាប់ពីមានការលើកឡើង ជុំវិញថា តើលោកនឹងធ្វើសេចក្តីថ្លែងការណ៍ខ្លាំងៗ អំពីអំពើឃោរឃៅ ក្នុងសម័យសង្គ្រាមរបស់ប្រទេសជប៉ុន និងហ៊ានប្រថុយប្រឈមនឹងការមានកំហឹងពីក្រុមស្តាំនិយមនៃគណបក្សរបស់លោកដែរ ឬអត់។

ក្នុងសុន្ទរកថា នាថ្ងៃសុក្រ (ទី១៥ ខែសីហា) នេះ អំឡុងពេលប្រារព្ធខួប ៨០ឆ្នាំ ចាប់តាំងពីការប្រកាសចុះចាញ់របស់ប្រទេសជប៉ុន ក្នុងសង្គ្រាមប៉ាស៊ីហ្វិក លោក Ishiba បានលើកឡើងថា៖ «យើងមិនត្រូវឲ្យសោកនាដកម្មនៃសង្រ្គាមកើតឡើងម្ដងទៀតឡើយ។ យើងមិនត្រូវជ្រើសរើសផ្លូវខុសម្តងទៀតនោះទេ។ យើងត្រូវតែចងចាំនៅក្នុងក្រអៅបេះដូងរបស់យើងនូវភាពសោកស្ដាយ និងមេរៀនពីសង្គ្រាមនោះ»។

ពាក្យពេចន៍នេះត្រូវបានសម្រាលយ៉ាងខ្លាំងពីការលើកឡើងរបស់នាយករដ្ឋមន្ត្រីសេរីនិយមមុនៗមួយចំនួន ប៉ុន្តែបានបន្ថែមឃ្លានៃពាក្យ «សោកស្ដាយ» ដែលមិនមាននៅក្នុងសេចក្តីថ្លែងការណ៍របស់អ្នកកាន់តំណែងមុន ដែលជាអ្នកមាននិន្នាការអភិរក្សនិយមជាង គឺលោក Shinzo Abe។

នេះបង្ហាញឲ្យឃើញអំពីការធ្វើឲ្យមានតុល្យភាពនូវវិធានការ ដែលលោក Ishiba ត្រូវតែអនុវត្តក្នុងនាមជានាយករដ្ឋមន្ត្រីមាននិន្នាការសេរីនិយម ដែលប្រឈមនឹងលទ្ធភាពនៃការមានការរិះគន់ពីសមាជិកសភាអភិរក្សនិយមនៃគណបក្សប្រជាធិបតេយ្យសេរីរបស់លោក ជាក្រុមដែលលោកទទួលបានភាពស្មោះត្រង់តិចតួចប៉ុណ្ណោះ។

សម្រាប់ពេលនេះ វាហាក់បីដូចជាមិនទំនងជាថា ក្រុមមាននិន្នាការស្តាំនិយម នឹងប្រើប្រាស់សុន្ទរកថានេះជាលេសរិះគន់លោក Ishiba នោះឡើយ ដោយសារតែលោកនៅតែមានការគាំទ្រខ្លះពីសាធារណជនទូទៅ បើទោះបីជាទទួលបាននូវលទ្ធផលដ៏គួរឲ្យខកចិត្ត នៅក្នុងការបោះឆ្នោតសភាជាន់ខ្ពស់ កាលពីខែមុនក៏ដោយ៕